14 KABABAIHAN NASAGIP, 4 ARESTADO SA HUMAN TRAFFICKING

NASAGIP  ng mga ahente ng  National Bureau of Investigation- Special Task Force (NBI-STF) ang 14 kababaihan at arestado naman ang  apat na indibidwal na sangkot sa human trafficking sa Lipa City Batangas .

Kinilala ni NBI Officer-In-Charge (OIC) Director Eric B. Distor ang mga naarestong suspek na sina Wilson Ebreo, Alora Almoguera, June Derilo, Robin Señar.

Nag-ugat ang operasyon sa impormasyon na ibinigay ng Destiny Rescue Pilipinas Inc. (Destiny), isang Non-Government Organization (NGO) na nakikibahagi sa paglaban sa human trafficking.

Ayon sa impormasyon, ang  mga suspek  ay sangkot umano sa human trafficking ng mga  kababaihan, menor de edad  at maging ang kanilang sariling menor de edad na anak.

Inaalok umano ng mga suspek ng P 3,500.00 hanggang  P6,000.00 ang  mga babae.

Nagsagawa ng survellaince ang NBI-STF at isa sa nagpanggap na seafarer at poseur costumer na  nagresulta ng pagkakaaresto ng mga suspek .

Sa mga nasagip na biktima, tatlo rito ang menor de edad.

Kasama rin sa nasagip ang siyam na buwang gulang na sanggol na  kasama ang kanyang ina sa mga biktima.

Kinasuhan ng Expanded Anti-Trafficking in Persons Act of 2012 na may ugnayan sa Special Protection of Children Against Abuse, Exploitation and Discrimination Act na may kaugnayan naman sa R.A.10175 o Cybercrime Law.

(GENE ADSUARA)