2020 December 24 Archive - People's Balita

April 19, 2024
Search in People's Balita
Ang Diyaryong Pinagkakatiwalaan

Archive for December 24th, 2020

Gaballo bagong WBC bantam interim champ

Posted on: December 24th, 2020 by @peoplesbalita No Comments

PASIKLAB uli si dating interim World Boxing Association (WBA) bantamweight champion Reymart Gaballo nang sorpresang alpasan si Emmanuel Rodriguez ng Puerto via split decision para iuwi sa Pilipinas ang World Boxing Council (WBC) bantamweight interim title sa Mohegan Sun Arena sa Uncasville, Connecticut, USA nitong Sabado (Linggo sa oras sa Maynila).

Kinopo ng 24-anyos, 5-6 ang taas, tubong Polomolok, Cotabato del Sur pero residente na ng Gen. Santos City (dating Dadiangas) ang dalawa sa tatlong score cards ng mga hurado sa loob ng 12 rounds, 115-113, 116-112, habang isa lang ang napunta sa kalaban, 118-110.

Huling minutong kapalitan lang si Gaballo sa kababayang nakabase sa Estados Unidos na si Nonito Donaire na nagpositibo sa Coronavirus Disease 2019 bago ang bakbakan.

Nagnegatibo man na siya sa tatlong huling test results, inayawan na siya ng mga fight organizer at kinasa ang bigwasan nina Gaballo at Rodriguez.

Umangat ang pro ring record ni `Assasin’ Gaballo sa 24-0 win-loss samantalang laglag sa 19-2 ang Puerto Rican. (REC)

‘McGregor, nais kong unahin sa 2021 ring comeback’ – Pacquiao

Posted on: December 24th, 2020 by @peoplesbalita No Comments

Inamin ni Pinoy ring icon Sen. Manny Pacquiao na si UFC superstar Conor McGregor ang una nitong gustong makalaban sa oras na magbalik na ito sa boxing ring sa susunod na taon.

Ayon kay Pacquiao, nais niya raw maranasan na makaharap sa ibabaw ng boxing ring ang isang MMA fighter.

Nilinaw naman ng Fighting Senator na hindi ito namimili ng nais nitong makatunggali dahil ang mahalaga aniya ay parehas sila ng timbang.

Maliban kay McGregor, sinabi ni Pacquiao na kabilang din sa mga prayoridad sina pound-for-pound king Terence Crawford at unified champion Errol Spence Jr.

Una nang sinabi ni Pacquiao na asam nitong magkaroon ng isa hanggang dalawang boxing fights sa 2021.

Kung maaalala, huling tumuntong si Pacquiao sa boxing ring noon pang Hulyo 2019 kung saan kanyang inagaw ang WBA welterweight title mula sa dating walang talo na si Keith Thurman.

Malakanyang, binalaan ang mga pasaway na pulis na ginagamit ang baril sa pagsalubong ng Bagong Taon

Posted on: December 24th, 2020 by @peoplesbalita No Comments

NANAWAGAN ang Malakanyang at binalaan ang mga pasaway na pulis na itago na lamang ang kanilang baril at huwag tangkain na gamitin bilang pagpasalubong sa pagpasok ng Bagong Taon.

“Eh kung pinagbabawal po ang karamihan sa mga paputok eh bakit naman gagamitin ang baril. ang bala ng gobyerno po ay ara sa pagpapatupad lamang ng batas, hindi po yan para sa Bagong Taon at kapag kayo ay nagpaputok pataas.. bababa at bababa po ang bala nyan at kapag may tinamaan ay mayroon po kayong kriminal na pananagutan. So, itigil na ninyo po iyan. itago niyo na po ang baril,” ayon kay Presidential spokesperson Harry Roque.

Aniya, may iba pa naman aniyang pamamaraan para magdiwang ng Bagong Taon.

Magugunitang napagkasunduan kamakailan ng mga alkalde ng Metro Manila na i-regulate ang paggamit at pagbebenta ng fireworks sa pagsalubong sa 2021 dahil sa patuloy na banta ng COVID-19.

Bukod sa paputok, pinaiiwas ng Department of Health ang publiko sa paggamit ng torotot o pito sa pagsalubong ng Bagong Taon.

Ayon kay Health Undersecretary Myrna Cabotaje, madali kasing magkahawahan ng coronavirus disease kapag gumamit ng hinihipang paingay.

“Do not use noise makers that will transmit COVID-19 and diseases via saliva,” ani Cabotaje,.

“Kahit nag-iingay tayo, kailangan naka-mask, dapat naka-face shield parati at distancing,” dagdag niya.

Hinikayat naman ni Health Secretay Francisco Duque III ang publiko na maghanap ng mga alternatibo sa paputok at iba pang paingay.

Ilan sa mga maaaring alternatibo ang tambol, busina o pagpalakpak, ayon sa kalihim.

Nauna nang nagbabala ang mga eksperto na maaaring tumaas ang bilang ng mga kaso ng COVID-19 kasunod ng holidays kung hindi susunod sa health protocols ang mga tao, tulad ng pagbabawal sa mass gathering at reunion.

Samantala, nanawagan din ang Bureau of Fire Protection sa publiko na maging maingat nitong holiday season.

Narito ang mga paalala ng bureau para sa ligtas na pagdiriwang:

Gumamit lang ng mga electric decorations na aprubado ng DTI at gamitin ito ng akma.

Patayin ang mga pailaw kapag matutulog na o aalis ng bahay.

Ilayo ang mga saksakan ng pailaw sa mga bata.

Huwag manigarilyo o maglagay ng ash tray, kandila malapit sa Christmas tree, kurtina at ibang dekorasyon na puwedeng pagmulan ng apoy.

Ilayo ang mga madaling masunog na bagay sa mga saksakan at pailaw.

Huwag mag-overload ng mga saksakan.

Huwag mag-imbak ng paputok nang matagal.

Huwag bigyan ng paputok ang mga bata.

Huwag magpaputok malapit sa bahay o matataong lugar.

Huwag sisindihang muli ang ano mang paputok na hindi sumabog. (Daris Jose)

Dagdag gastos sa Tokyo Olympics, pinaplantsa na

Posted on: December 24th, 2020 by @peoplesbalita No Comments

Magpupulong ngayong araw ang organizing committee ng Tokyo Olympics 2021 para pag-usapan ang karagdagang gagastusin nila sa opening at closing ceremonies.

Plano kasi ng organizer na gumastos ng karagadang $33.7 million.

Nauna ng mayroong $82 million ang inilaan na budget sa opening ceremony subalit dahil sa coronavirus pandemic ay hindi ito ipinagpatuloy.

Magugunitang nagpatupad na ng 50 cost-cutting measures ang Inernational Olympic Committee at organizers gaya ng iniksian na lamang ang pamamalagi ng mga manlalaro sa athletes village para hindi na kumalat pa ang virus.

Gaganapin ang nasabing Olympics sa Hulyo 23 hanggang Agosto 8, 2021.

IMMIGRATION, INILAGAY SA HEIGHTENED ALERT NGAYON HOLIDAY SEASON

Posted on: December 24th, 2020 by @peoplesbalita No Comments

INILAGAY sa heightened alert ng Bureau of Immigration ang lahat ng kanilang mga tauhan sa iba’t ibang ports of entry nitong holiday season.

Dahil dito, ipinag-utos ni Immigration Commissioner Jaime Morente ang kanyang mga immigration officers na naka-deploy sa iba’t ibang international airports at seaports na magdagdag ng karagdagang pagbabantay sa mga padating at palabas na mga mananakay.

“This is to ensure that our campaign to thwart the entry of illegal aliens and prevent the departure of trafficking victims is not compromised during this Christmas season,” ayon kay Morente.

Binalaan din ni Morente ang mga sindikato ng human smuggling at human trafficking na namamantala ngayon Kapaskuhan sa kabila ng pandemiya.

“Do not even try because our officers at the airports will surely foil any attempts by these syndicates to ply their racket,” ayon sa BI chief.

Binanggit dito ni Morente ang kaso ng ilang dayuhan na nahulia sa airport sa Manila at Cebus dahil sa mga pekeng dokumento gayundin ang isang nasabat na biktima ng human trafficking sa Ninoy Aquino International Airport (NAIA) kung saan isang pasahero ang nagtangkang lumabas ng bansa at nagpanggap na turista gamit ang mga pekeng dokumento.

“These tricks will not work as our immigration officers are trained in passengers assessment and detecting fraudulent travel documents,” ayon pa kay Morente. (GENE ADSUARA )

Sana ako si Santa Klaus (2)

Posted on: December 24th, 2020 by @peoplesbalita No Comments

NASABI na po kahapon ng Opensa Depensa ang Christmas wishes para sa ilang sports officials at athletes natin sa unang labas ng serye ng pitak na ito dahil nga Pasko 2020 na sa Biyernes, Disyembre 25.

Kabilang sa una ko pong mga natalakay na gusto kong ipagkaloob sa kanila kung ako sana si Santa Klaus dahil Pasko naman ay sina Philippine Sports Commission (PSC) Chairman William Ramirez, Philippine Olympic Committee (POC) president AbarahamTolentino;

Pole vaulter Ernest John Obiena, gymnast Carlos Edriel Yulo, boxers Eumir Felix Marcial at Irish Magno.

Gayundin sa mga national sports association (NSA) na Philippine Athletics Track and Field Association (PATAFA) pres. Philip Ella Juico, Gymnastics Association of the Philippines (GAP) pres. Cynthia Carrion-Norton, at Association of Boxing Alliances in the Philippines (ABAP) prexy Victorico Vargas.

Para po sa ikalawang batch:

Weightlifting Hidilyn Diaz – Hindi lang mag-qualify kundi magkamit ng gold medal sa 32nd Summer Olympic Games 2020 sa Tokyo, Japan na ni-reset lang sa Hulyo 2020 sanhi ng pandemya, sa pang-apat at huli na niyang quadrennial sportsfest makaraang mag-silver sa 2016 Riode de Janeiro Olympics.

Mary Joy Tabal – Makapasa sa Olympic Qualifying women’s marathon para sa ikalawa niyang pagkatawan sa bansa sa 2020 Tokyo Games at suntok man sa buwan, nawa’y makamedalya para sa maaring graceful exit na sa national team ng pinakamagaling na lady marathoner natin sa kasaysayan ng event sa may 50 taon.

Christine Hallasgo – Mag-qualify sa Tokyo Olympics tapos palitan si Mary Joy Tabal bilang No. 1 lady marathoner ng ‘Pinas noong 2019.

National MILO Marathon – Makabalik sa 2021 para sa ika-44 na edisyon makaraang makansela ang 43rd edition sa taong ito sanhi ng Covid-19 ,at makatuklas ng tigasing lalaki na magbabalik sa bansa sa trono ng men’s division sa 31st Southeast Asian Games 2021 sa Vietnam.

Karateka Jamie Christine Lim – Makapasa rin sa Olympic Qualifying Tournament upang makapasok sa 2020 Japan Olympics. (REC)

Morissette at nobyong kapwa singer na si Dave Lamar, engaged na

Posted on: December 24th, 2020 by @peoplesbalita No Comments

Masayang ibinahagi ng singer na si Morisette at Dave Lamar na sila ay engaged na.

Sa kaniyang Instagram account, nagpost ng larawan ang 24-anyos na si Morisette na kasama ang 30-anyos na kapwa singer at suot ang engagement ring.

Kuwento pa nito na siyam na taon na sila magkakilal at pitong taon na naging mag-best friend.

Magugunitang noong nakaraang taon ng naging usapin ang pagtutol ng ama ni Morisitte sa relasyon nila.

RICHARD YAP, excited nang magtrabaho sa Kapuso network

Posted on: December 24th, 2020 by @peoplesbalita No Comments

It seems handang-handa na si bagong Kapuso actor Richard Yap sa pagtatrabaho para sa kanyang first ever Kapuso show. First time ni Richard na gaganap sa isang guest role sa well-loved comedy anthology na “Dear Uge.”

Inamin ni Richard na ngayong nakapirma na siya ng exclusive contract sa GMA -7, he is grateful na sa gitna ng pandemic na pinagdadaanan natin ngayon, ang daming ibang stations na letting go people, maraming taong nawawalaan ng trabaho, kaya he’s so lucky raw na in-accept siya to be part of GMA Network.

Kaya labis ang pasasalamat ni Richard na pinayagan siyang sumubok sa ibang genres, kaysa doon sa nakasanayan na niyang gawin sa dating network. Kaya ita-try naman niya ngayon ang magpatawa at kumanta.

“Napapanood ko pa lamang ang mga comedians na sina Boobay at Super Tekla sa kanilang comedy show, para bang dapat may extra effort akong gagawin para masabayan ko man lamang ang dalawang komedyante. At salamat din na pinagbigyan nila akong bigyan ng guest role sa “Dear Uge,” dahil kaibigan ko si Eugene Domingo at sana masabayan ko man lamang ang husay niya” sa pagpapatawa.”

*****

Marami nang nai-excite na makita ang muling magkikita sina Lilian (Katrina Halili) at Jaime (Wendell Ramos) sa Afternoon drama series na “Prima Donna.” Pero paano iyon, civilly wed na sina Kendra (Aiko Melendez) at Jaime, pero magkakarooon daw ito ng malaking kasalan, dahil hindi papayag si Donya Claveria na hindi engrande an kasalan ng kanyang unico hijo.

Hanggang January, 2021 pa mapapanood ang “Prima Donnas” na dinidirek ni Ms. Gina Alajar, at lahat na gustong makitang makabalik ang mga teens na kasama sa story. Na binawalan sila dahil sa age limit na hindi pa pwede sila mag-appear.

Pero may pasabog na pinakahihintay ang mga televiewers ngayong weekend. Ikatutuwa kaya ito ng mga Solid Lilian Fans at ikainis naman ng mga fans ni Kendra at ng anak niyang si Brianna? Ito nab a ang pinahihintay na big reveal mula kay Lilian?

*****

Isa pang exciting na finale ang pinakahihintay sa “Magkaagaw” na nagtatampok kina Sheryl Cruz, Sunshine Dizon, Klea Pineda at Jeric Gonzales. Sa direksyon naman ito ni Ms. Gina Alajar. Sino ang mananalo sa pagitan nina Klea at Jeric? Marami nang naghihintay dito dahil gusto rin nilang malaman kung mananalo ba ang masama kaysa mabuti?

*****

Actually, pare-parehong kaabang-abang ang mga afternoon teleserye na “Bilangin Ang Bituin sa Langit, at ang mga GMA Telebaba, isa na rito ng pinag-uusapang “Love of my Life” nina Carla Abellana, Coney Reyes, Rhian Ramos, Mikael Daez na malapit na ring magtapos ag seryeng ito. (NORA CALDERON)

Zarate, ginagamit di umano ang perang kinokolekta ng NPA para pag-aralin ang anak sa Europa

Posted on: December 24th, 2020 by @peoplesbalita No Comments

INAKUSAHAN ni Pangulong Rodrigo Roa Duterte si Bayan Muna Representative Carlos Zarate nang paggamit ng pera na kinolekta ng New People’s Army para bayaran ang pag-aaral ng kanyang anak sa Europa.

Sa public address ni Pangulong Duterte, Lunes ng gabi ay sinabi nito na duda siya kung paano napag-aral ni Zarate ang kanyang anak sa ibang bansa.

“Sinasabi mo na si Sandro, anak mo, ginagastusan ng lola. You know, baka sabi mo talagang maloloko mo ang Pilipino lalo na kami dito. Ang lola tiningnan namin, matanda na, wala namang income,” ayon kay Pangulong Duterte.

Sinabi ng Pangulo na may mga hawak siyang dokumento na may kinalaman kay Zarate kabilang na ang birth certificate at income history nito.

Ayon sa Pangulo, ang anak ni Zarate ay nag-aaral sa The John Paul II Catholic University of Lublin sa Poland.

Ani Pangulong Duterte, base sa kanilang record, madalas ang pagbyahe ni Zarate sa Europa.

Kung ang sweldo mo, Zarate, ‘yan ang ginagastos mo para sa anak mo, pinapasa mo don sa nanay mo na matanda na, eh you’re pulling everybody’s leg. Wag mo kaming bolahin,” ayon sa Punong Ehekutibo.

“Baka kaya siguro ang ginagastos mo ‘yong perang kinokolekta ng mga NPA dito. Hindi nila alam na ang kinokolekta nila pumupunta ‘yan doon sa mga lider, malalaki ang kita tapos sila hirap. ‘Yan ang problema diyan sa mga NPA, nagpapaloko kasi kayo,” dagdag na pahayag nito.

Biniyang diin pa ni Pangulong Duterte na ang ina ni Zarate na sinasabi at itinuturong siyang nagbabayad para makapag-aral ang anak niya (Zarate) sa ibang bansa ay walang “source of income”.

“Walang income ang nanay mo. Matanda na so ikaw talaga ‘yan kay anak mo ‘yan. I would not want to go into remittances kasi while we have a way of knowing pero alam namin na you send money regularly to your son,” ang pahayag ng Pangulo.

Bukod dito, si Zarate ay may “incongruity” sa kanyang ideology.

“Kunwari galit ka sa mga mayayaman. Kunwari galit ka sa mga ‘di nagbabayad ng wastong buwis, nagfa-falsify ng mga properties nila.

You’re a hypocrite… You’re a chauvinist pig,” diing pahayag ng Pangulo.

Samantala, matapang na sinabi ng Pangulo na nais niyang makausap si Zarate, maaari rin aniya nitong isama si dating Senador Antonio Trillanes IV bilang bodyguard.

“Gusto kitang makausap kung talagang lalaki ka. Okay na ‘yang komunista ka. Kung lalaki ka talaga, tanggapin mo ang hamon ko. Saan mo gusto tayong magkita? O gusto mo bodyguard, isama mo na si Trillanes,” ani Pangulong Duterte sabay sabing “Sige ako mag-isa, dalawa kayo.”(DARIS JOSE)

Hindi lahat ng pulis ay bugok gaya ni Nuezca – Malakanyang

Posted on: December 24th, 2020 by @peoplesbalita No Comments

Hindi lahat ng pulis ay bugok kagaya ni Senior Master Sergeant Jonel Nuezca.

Ito ang binigyang diin ni Presidential Spokesperson Harry Roque kasunod ng brutal na pagbaril in point blank ni Nuezca sa walang kalaban- laban na mag-inang sina Sonya Rufino Gregorio at anak nitong si Frank Anthony Rufino Gregorio, sa Paniqui, Tarlac sa gitna ng argumento, dahil di umano sa “boga” at right of way.

Ayon kay Sec. Roque, isang bugok lamang na pulis si Nuezca at hindi naman lahat ng kagawad ng pulisya ay kagaya nito.

Matindi aniya ang ipinatutupad na disiplina sa mga pulis kasama na ang tamang paggamit ng armas.

Sinabi pa ni Sec. Roque na ang baril ay para sa proteksyon ng mga alagad ng batas at hindi para gamitin laban sa kanilang mga personal na kaaway.

“Gaya ng aking nasabi kanina, isang bugok lang po iyang pulis na iyan; hindi naman po lahat ng pulis eh gaya niya.
Siyempre po, ang baril eh para sa proteksyon ng ating mga kapulisan, hindi po iyan para gamitin laban sa kanilang mga personal na mga kaaway,” anito.

Aniya, exception ang mga bugok sa kapulisan gaya ni Nuezca na bumaril sa mga walang kalaban laban.

“Uulitin ko po ‘no, talagang exception po ang mga bugok sa kapulisan; by and large po matindi po ang disiplina naman ng ating mga kapulisan,” lahad ni Sec. Roque. (Bishop Jesus “Jemba” M. Basco)