TINATAYANG nasa 405 million na mga mag-aaral mula sa 23 mga bansa ang nananatiling apektado ng pagsasara ng mga paaralan nang dahil sa COVID-19 pandemic.

Batay sa pinakahuling ulat na inilabas ng United Nations Children’s Fund (UNICEF), nasa 23 mga bansa pa mula sa iba’t ibang panig ng mundo ang hindi pa tuluyang nakakapagbukas ng kanilang mga paaralan, habang maraming mga estudyante rin ang nanganganib din na tumigil sa kanilang mga pag-aaral nang dahil sa pandemic.

Ayon kay UNICEF Executive Director Catherine Russell, malaking kawalan sa pagkatuto ng mga bata kung hindi magkakaroon ng pagkakataon ang mga ito na makipag-ugnayan sa ibang tao tulad ng kanilang mga guro, at mga kaibigan.

Ito rin aniya ay maaaring magbunsod sa inequality sa pag-access sa karunungan sa pamamagitan ng edukasyon na nanganganib naman na maging isang greatest divider, sa halip na maging isang greatest equalizer.

Sa datos pa ng UNICEF, sinasabing nasa 147 million na mga kabataan ang hindi nakadalo sa mahigit kalahati ng kanilang in-person classes sa nakalipas na dalawang taon.

Bukod dito ay marami rin ang mga batang hindi na bumalik pa sa pag-aaral matapos na buksan muli ang kanilang mga paaralan dahilan para malagay ang mga ito sa mataas na panganib ng pagsasamantala at habambuhay na kahirapan.

Ngunit sa kabila nito ay inamin din ni Russell na may mga pagkakataon pa rin walang garantiya na matututo ng basic knowledge ang mga mag-aaral na pumapasok sa mga paaralan dahil sa napakabagal na kasalukuyang pace ng learning ngayon kung saan ay tinatayang aabutin pa ng pitong taon para sa karamihan ng mga mag-aaral para lamang matuto ng mga kasanayan sa pagbabasa na dapat sana ay natututunan lamang sa loob ng dalawang taon.

Dahil dito ay kinakailangan na mabigyan ng masinsinang suporta ang mga mag-aaral na kanilang kailangan upang muling makabawi sa kanilang edukasyon.

Bukod dito, dapat ding tiyakin ng mga bansa na ang mga guro ay may mga training at learning resources na kanilang kinakailangan.

MALAKING problema sa susunod na administrasyon ng Maynila ang lugmok nitong kabuhayan at ang malaking utang sa mga lokal na bangko sa bansa.

“Nakalulungkot kasi po, napakaraming pera … pero umutang pa ang city hall ng mahigit sa P15-bilyon na ginastos sa mga maling priority. Sino ang hindi madidismaya sa economic condition ng Maynila,” sabi ni  Atty. Alex Lopez.

Lalo pang nalungkot ang negosyante at ekonomistang panganay na anak ni dating Manila Mayor Mel Lopez ang katotohanang naunahan na ang Maynila ng mga katabing siyudad tulad ng Quezon City, Makati at Pasig sa Metro Manila.

“Sa maraming bagay, napag-iwanan na ang Maynila,” sabi ni Atty. Lopez na pamangkin ni dating Manila 2nd District Rep. Jim Lopez.

Dagdag ni Lopez, malaking pondo ang iniwan ng kanyang ama nang iwan ang city hall, ” sa tantiya ko, aabot ng mahigit na cash na P1.2 bilyon noong 1992.”

Kung sa palitang dolyar sa piso ngayon,  katumbas ng P20-bilyon ang P1.2–bilyon ang iniwang pondo ni Mayor Lopez sa Maynila.

Kung siya ang pagtitiwalaang maging alkalde, sinabi ni Atty. Lopez sisikapin niyang maibalik ang tawag sa Maynila na ” Pearl of the Orient.”

Ikatlo na lamang ang Maynila sa may malaking income sa mga siyudad sa Metro Manila.

Kung hindi mababago ang liderato sa city hall, nangangamba si Atty. Lopez na iiwanan na ito ng Quezon City, Makati, Pasig at iba pang siyudad sa bansa.

“Ikinatatakot ko, magiging kulelat pa tayo kung hindi maaagapan,” pangamba ni Lopez.

Tiwala ng mga negosyante ang kailangang maibalik sa Maynila at mapataas ang koleksiyon ng buwis at iba pang bayarin.

“Ibabalik natin ang tiwala ng mga negosyante sa City of Manila. ‘Yong tax at permits, ibaba na ‘yan. Padaliin na ‘yong city permits para hindi na pinahihirapan nila ang mga negosyante,” ani Lopez.

Kukuha siya ng magaling na taong hahawak sa salapi ng lungsod.

Gagawin niya sa tulong ng City Council na maibababa  ang tax at city permits para mapabilis ang proseso nito at mahikayat ang mga negosyanteng mamuhunan sa Maynila.

“Pati ang big foreign investors ay hihikayatin natin na mag-invest at bibigyan natin sila ng kaluwagan at mabilis na business permits,  walang red tape nang sumigla ang economy, makalikha ng maraming industry,  establishments, trabaho at mapagkakakitaan,” sabi ng kandidatong mayor ng PFP.

Tungkol sa mahigit na P15-bilyong inutang ng kasalukuyang administrasyon, sinabi ni Lopez na sana ay naiukol sa mga tamang proyekto ang salapi.

“Sa hindi tamang priority ginastos ang mga inutang,  sayang ang laki ng pera (ng Maynila), kung saan-saan lang napunta at kailangan na maipaliwanag nila ito sa taumbayan,” sabi ni Atty. Lopez. (BISHOP JESUS “JEMBA” M. BASCO)