Nilagdaan na ni Pangulong Ferdinand “Bongbong” Marcos Jr. angSenate Bill No. 2221 at House Bill No. 7325 o Magna Carta for Filipino Seafarers.

Sa ceremonial signing na pinangunahan ng Pangulo sa Malakanyang, sinabi nito ang kahalagahan ng bagong batas na naglalayong ipaglaban ang karapatan at pagpapahalaga sa mga seafarers na nagtatrabaho at nagsasakripisyo sa ibang bansa.

“At its core, this new law aims to uphold the fundamental rights of our overseas seafarers: their right to fair wages, safe working conditions, and skills and competency development, amongst others,” sinabi pa ni Marcos.

Pahayag pa ni ­Pangulong Marcos, na ang patas na sweldo ay hindi lamang tungkol sa patas na numero sa paycheck kundi dapat makakuha rin ng patas na kabayaran ang mga seafarers para sa kanilang hirap at dedikasyon.

Pagdating naman aniya sa kondisyon sa trabaho, ang mga kumpanya ay hindi lamang dapat nakatutok sa pagsunod kundi dapat din tiyakin ang kaligtasan at proteksyon hindi lamang mula sa mga panganib na kinakaharap kundi pati na rin sa pananamantala at diskriminasyon.

Dagdag pa ng Pangulo na ang Magna Carta ay naaayon para sa makasabay sa pamantayan sa pagsasanay, Certification and Watchkeeeping (STCW) gayundin sa pagtanggap sa global maritime labor laws.

Sa pamamagitan aniya nito ay tiyak na ang mga seafarer natin ay hindi lamang sumusunod kundi mahusay at handang harapin ang mga hamon ng nagbabagong industriya ng maritime. (Daris Jose)

SINIGURO ng Toll Regulatory Board (TRB) na hindi sila maniningil ng penalty sa mga hindi susunod sa paglalagay ng Radio Frequency Identification (RFID) sa kanilang mga sasakyan.

Pahayag ito ng TRB sa kabila nang sinabi ni Transportation Secretary Jaime Bautista na sisimulan na sa Enero ang paniningil ng multa sa mga sasakyang walang nakakabit na RFID.

Sa pulong balitaan sa Malakanyang, sinabi ni TRB executive director Atty. Alvin Carullo, aayusin muna ang operation issues ng mga toll operators.

“Pag-aaralan po namin, kung sa dumating ­January natin talagang hindi pa rin nakakamit nila iyong tinatawag natin na efficiency ng ating toll operation system, maaari po na i-differ pa natin ng further,” ayon kay Carullo.

Nasa P1,000 ang multa para sa first offense, P2,000 sa second offense at P5,000 sa subsequent offenses.

Tiniyak naman ni Carullo na pagmumultahin ang mga toll operators kung mabibigo silang ayusin ang kanilang sistema. (Daris Jose)

HINDI umabot ng 10 minuto ang ginawang pag-apruba ng Senate Finance Subcommittee sa panukalang P10.5 bilyon budget ng Office of the President para sa 2025.

Humarap sa Finance Subcommittee na pinamumunuan ni Sen. Grace Poe si Executive Secretary Lucas Bersamin.

Ang panukalang budget ng tanggapan ni Pangulong Ferdinand Marcos Jr. para sa susunod na taon ay mas mababa ng 1.88% kaysa sa budget ngayong 2024.

Ipinunto ni Poe na ilan sa mga ehensiya na nasa ilalim ng Office of the President, katulad ng Presidential Anti-Organized Crime Commission (PAOCC) ay nakatulong sa mga anti-crime initiatives, lalo na sa isyu ng mga ilegal na Philippine Offshore Gaming Operators (POGO).

“The President has created the new presidential office for child protection and I think it’s high time for that and many of us are very grateful to protect our children, the most vulnerable in society,” ani Poe.

Sinabi naman ni Bersamin na ang pagbabawas sa panukalang budget ay hindi makakaapekto sa paghahatid ng mga serbisyo ng Pangulo sa mga Pilipino.

Mabilis na naaprubahan ang panukalang budget ng OP dahil sa tinatawag na “parliamentary courtesy.” (Daris Jose)

HANDANG bumili ang Land Transportation Office (LTO) ng dagdag na breath analyzers para sa kaligtasan ng lahat ng motorista sa bansa.

Ang naturang breath analyzers ay para sa full implementation ng Anti-Drunk and Drugged Driving Act of 2013. Sa pamamagitan ng naturang analyzers ay madalian nang madedetermina ang isang motorista na lango sa alak na isang dahilan kung bakit nagkakaroon ng aksidente ang mga motorista sa lansangan.

“And to ensure effective enforcement, we have to download as many breath analyzers that could be used by traffic and law enforcers on the ground,” sabi ni LTO Chief Vigor Mendoza.

Aniya, inaalam din ng tanggapan kung ano ang nangyari sa 756 units ng breath analyzers na nabili noong 2015 at 2017.

Sa 756 units ng breath analyzer, halos lahat ay sira na at aabot lamang sa 288 dito ang maaaring makumpuni.

Sinabi ni Mendoza na mahalaga na maipamahagi ang mga breath analyzers sa bawat rehiyon upang maipatupad nang husto ang naturang batas. (Daris Jose)

HIMAS-REHAS ang isang lalaki na wanted sa kaso ng panggagahasa sa Lungsod ng Valenzuela matapos makorner ng pulisya sa manhunt operation sa Sta. Cruz Laguna.

Sa ulat ni Valenzuela police chief P/Col. Nixon Cayaban kay Northern Police District (NPD) Director P/BGen. Rizalito Gapas, nakatanggap sila ng impormasyon hinggil sa pinagtataguang lugar ng 37-anyos na akusado na kabilang sa mga most wanted person sa lungsod.

Inatasan ni Col. Cayaban ang Warrant and Subpoena Section (WSS) na bumuo ng team para sa isasagawang pagtugis sa akusado.

Kaagad namang ikinasa ng WSS ang manhunt operation na nagresulta sa pagkakaaresto sa akusado sa kanyang pinagtataguang lugar sa Brgy. Palasan, Sitio 5, Sta. Cruz Laguna, dakong alas-9:30 ng gabi.

Ang akusado ay binitbit ng pulisya sa bisa ng warrant of arrest na inisyu ni Presiding Judge Mateo B Altarejos ng Regional Trial Court Branch 16-FC, Valenzuela City noong July 8, 2019 para sa kasong Rape.

Walang inirekomendang piyansa ang korte para sa pansamantalang paglaya ng akusado na nakapiit ngayon sa custodial facility unit ng Valenzuela police habang hinihintay ang commitment order mula sa hukuman.

Pinuri naman ni Gen. Gapas si Col. Cayaban at ang kanyang mga tauhan sa kanilang pagsisikap na tugisin ang mga taong wanted na pinaghahanap ng batas na nagresulta sa pagkakadakip sa akusado. (Richard Mesa)