NAKATAKDANG magsagawa ng ikatlong public hearing ang House Tri-Committee (Tri-Comm) ngayong Biyernes upang tugunan ang lumalaking isyu ng disinformation at fake news online.

Kabilang sa inimbitahan ang nasa 11 social media personalities at vloggers, kasama na si dating Communications Secretary Trixie Cruz-Angeles, na posibleng makaharap sa contempt at

detention kapag patuloy sa hindi pagdalo sa imbestigasyon.

Una nang nagpalabas ang Committees on Public Order and Safety, Information and Communications Technology, at Public Information ng show cause orders sa mga naturang indibidwal na isinasangkot sa pagpapakalat umano ng misleading online content.

Sa kabila ng ilang summons, nabigo ang ilan sa mga ito na dumalo sa pagdinig ng panel na siyang dahilan upang magpatupad ng legal na hakbang ang komite kabilang na ang pag-isyu ng subpoenas laban sa 11 vloggers.

Sinabi ni Laguna Rep. Dan Fernandez, overall chair ng Tri-Comm, na layon ng imbestigasyon ng komite na mapanagot ang mga indibidwal na nagpapakalat umano ng pekeng balita at content sa online.

“Disinformation is a national security issue. It erodes public trust, destabilizes institutions, and manipulates democratic discourse. We cannot allow social media to become a free-for-all platform for deception and propaganda,” ani Fernandez. (Vina de Guzman)

TINULIGSA ni House Committee on Overseas Workers Affairs Chairman Jude Acidre ng Tingog Party-list ang naging pahayag ni dating presidential spokesperson Harry Roque na isusulong niya ang pagkuha ng asylum sa Netherlands.

Naniniwala ang mambabatas na isa itong desperadong hakbang para makaiwas umano sa panangutan sa alegasyon laban sa kanya tulad nang pagkakasangkot umano sa offshore scam hubs o Philippine Offshore Gaming Operators (POGOs).

“Roque’s asylum bid is nothing more than a cowardly maneuver to escape the consequences of his actions. He has been cited in contempt and ordered detained for his refusal to cooperate in our investigation into POGO-related criminal activities. Now, he wants to flee the country to avoid answering for his alleged role in a human trafficking scheme. If he has nothing to hide, why is he running?” pagtatanong nito.

Ang hakbang ni Roque ay kasunod na rin sa isinampang kaso ng human trafficking laban sa kanya at dalawang iba pa sa Department of Justice (DOJ), may limang buwan na ang nakalilipas.

Binigyan-diin pa ni Acidre na ang biglaang asylum application ni Roque ay lalong nagpalaki ng suspisyon sa pagkakasangkot nito sa mga akusasyon laban sa kanya.

“This is not just about contempt in Congress anymore. Roque is now facing serious criminal charges that involve human trafficking—one of the gravest crimes under Philippine and international law. His decision to seek refuge abroad is an obvious attempt to shield himself from prosecution and avoid being held accountable for his actions,” dagdag nito.

Hinikayat namann ni Acidre ang mga law enforcement agencies na makipag-coordinate sa international authorities upang mapigilan si Roque na magamit ang asylum para protektahan siya sa prosecution.

“The law must take its course. We cannot allow individuals to exploit international legal mechanisms just to escape criminal liability. Roque may attempt to run, but the long arm of the law will eventually catch up with him. We will ensure that he faces justice—whether here or abroad,” pgatatpos ni Acidre.

(Vina de Guzman)

INIHAYAG ni House Deputy Majority Leader Janette Garin ng Iloilo na isang malaking pekeng balita ang espekulasyon na planong magpatupad ng martial law ang administrasyong Marcos upang pigilan ang kalat-kalat na mga protesta ng kaalyado ni dating President Rodrigo Roa Duterte.

Kasabay nito, sinigura ng mababatas na tuloy ang halalan sa May 12 dala na rin sa ginagawang kampanya ni Pangulong Bongbong Marcos sa kanyang mga senatorial candidates.

“Napakalayo sa katotohanan nung fake news na magkaka-martial law. Kapag martial law ka, parang lahat ng pinaghirapan ng Pangulong Bongbong Marcos, kaakibat na ‘yung mga nakaraang administrasyon, ay itatapon lamang. So napakalaking fake news nito,” aniya.

Kitang-kita rin aniya ang todo ikot ng pangulo para mangampanya sa eleksyon.

“Kasi kung magde-declare yan ng martial law wala nang mag-eleksyon. So it’s really untenable, parang malayong-malayo,” pahayag nito.

Sinabi ni Garin na abala ang pamahalaan sa pagtulong sa sambayanan na maibaba ang presyo ng pagkain at maibaba ang inflation.

Nagbabala ito sa posibleng negatibong kahihinatnan ng pagpapakalat ng fake news. (Vina de Guzman)

PINAPURIHAN ni Speaker Ferdinand Martin Romualdez si Senate President Francis “Chiz” Escudero at ang liderato ng senado sa kanilang mabusising preparasyon para sa impeachment trial ni Vice President Sara Duterte sa Hunyo.

“The Senate has shown its commitment to upholding due process and ensuring a fair and impartial impeachment trial. I extend my deepest gratitude to Senate President Escudero and the entire Senate for their readiness and professionalism in handling this historic proceeding,” ani Romualdez.

Nagawa na aniya ng Kamara ang parte nito sa pagsusumite ng Articles of Impeachment, at handa na rin ang prosecution panel para iprisinta ang kaso sa sandaling magsimula na ang pagdinig ng impeachment court.

“ We trust that the Senate will carry out its constitutional duty and proceed with the trial without unnecessary delays, in accordance with the rule of law,” dagdag nito.

Ang pahayag ng speaker ay matapos ang isinagawang pagbisita at inspeksyon ni House Secretary General Reginald Velasco at iba pang opisyal ng kamara sa gagamiting pasilidad sa senado na inilaan sa House prosecution team.

“Nakita natin sa pagbisita ng ating House Secretary General sa Senado ang kahandaan ng ating mga kasamahan sa Mataas na Kapulungan. Napakahalaga ng maaga at maayos na paghahanda upang matiyak ang kaayusan pagdating ng impeachment trial,” aniya.

Unang binisita nina Velasco ang Senate session hall, na magsisilbing venue para sa trial, at sa Sen. Arturo M. Tolentino Room, na siyang itinalagang opisina para sa House prosecutors.

Siniguro ni Speaker Romualdez sa publiko na handa na ang House prosecution team para iprisinta ang kaso anumang oras na buksan ang Impeachment Court. (Vina de Guzman)

LAGLAG sa selda ang dalawang drug suspects, kabilang ang isang High Value Individual (HVI) matapos makuhanan ng mahigit P.3 milyong halaga ng shabu nang maaresto sa isinagawang buy bust operation sa Caloocan City, kahapon ng madaling araw.

          Sa ulat, nagpositibo ang natanggap na impormasyon ng mga opertatiba ng Northern Police District – District Drug Enforcement Unit (NPD-DDEU) hinggil sa umano’y illegal drug activities ni alyas “Ronron”, 24, driver ng Brgy. 145.

          Nang magawang makipagtransaksyon sa suspek ng isa sa mga operatiba ng DDEU na nagpanggap na buyer, ikinasa nila ang buy bust operation sa koordinasyon sa PDEA.

          Nang matanggap ang signal mula sa isa nilang kasama na positibo na ang transaksyon, agad lumapit ang mga operatiba ng DDEU saka dinamba ang suspek, kasama ang kasabwat na si alyas “Drey”, 20, sa Mapayapa St., Brgy. 145 dakong alas-2:42 ng madaling araw.

          Nakumpiska sa mga suspek ang humigi’t kumulang 50 grams ng hinihinalang shabu na may katumbas na halagang P340,000 at buy bust money.

          Mahaharap ang mga suspek sa kasong paglabag sa Sections 5, 11, at 26 ng Article II ng RA 9165, o ang Comprehensive Dangerous Drugs Act of 2002.

Pinuri naman ni PCol. Josefino Ligan, Acting District Director ng NPD ang hindi natitinag na dediskayon ng DDEU. “We are fully committed to aggressively pursuing drug syndicates and dismantling their networks. Our fight against illegal drugs will continue until our communities are free from this menace,” giit niya. (Richard Mesa)

NAGPASALAMAT sina Navotas Mayor John Rey Tiangco at Congressman Toby Tiangco sa Department of Social Welfare and Development (DSWD) sa pagpili sa Navotas bilang pilot site para sa “e-PANALO ang Kinabukasan,” isang programang nagsusulong ng digital financial literacy at pagsasama para sa mga benepisyaryo ng 4Ps.

Ang unang batch ay kinabibilangan ng 50 miyembro ng 4Ps na nakatanggap ng mga mobile phone para tulungan silang mag-navigate sa mga digital na transaksyon at financial platform.

May 852 4Ps beneficiaries na dumalo sa launching ang nakatanggap din ng P2,000 na tulong pinansyal.

“Malaki ang pasasalamat natin sa DSWD sa pagpili sa Navotas bilang unang lungsod sa NCR na makikinabang sa e-PANALO program. Sa pamamagitan nito, mas mapapabilis at mapapadali ang pagbibigay ng tulong sa ating mga 4Ps beneficiaries,” ani Tiangco.

“But more than that, we are equipping them with knowledge and skills in digital technology while helping them build a stronger foundation in financial literacy,” dagdag niya.

Pinuri rin ni Tiangco ang DSWD, sa pamumuno ni Sec. Rex Gatchalian, para sa paninindigan nito sa pagbabago sa mga serbisyong panlipunan.

“Muli, taos-pusong pasasalamat sa DSWD, sa pangunguna ni Sec. Rex Gatchalian, sa pagpapalawak ng programang ito. Hindi lang natin ginagawang mas accessible ang tulong pinansyal—binibigyan natin ang ating mga 4Ps beneficiaries ng kakayahan para mas maging handa sa digital at financial landscape ng ating panahon,” pahayag ni Cong. Tiangco. (Richard Mesa)