HINILING ni House Assistant Minority Leader at Gabriela Partylist Rep. Arlene Brosas ang pagsasagawa ng isang malaliman at independent investigation sa naganap na aksidente sa NAIA Terminal 1 na ikinasawi ng dalawang indibidwal na kinabibilangan ng isang 5-anyos na bata at madaling pagkasira ng safety bollards.

“Nakakagalit at nakakabahala na ang mga istrukturang dapat sana’y nagpoprotekta sa ating mga mamamayan ay basta-basta na lamang bumagsak. Hindi ito simpleng aksidente lamang kundi isang trahedyang maaaring naiwasan kung may tamang implementasyon ng mga safety standards,” ani Brosas.

 Lumilitaw sa dokumento na ang mga nakalagay na bollards ay inilagay noong 2019 sa panahon ng NAIA rehabilitation program sa ilalim ng pangasiwaan ni dating Transportation Secretary Arthur Tugade na panahon ni Duterte administration.

“This tragedy exposes the deadly consequences of corruption in government projects. When contractors cut corners and use substandard materials, when officials turn a blind eye to proper inspections, it is the Filipino people who pay the ultimate price,” pahayag ni Brosas.

Dapat aniya, maimbestigahan ang lahat ng opisyal na sangkot sa procurement, installation, at inspection ng bollards,

“Hindi pwedeng walang mananagot. Dalawang buhay ang nawala, kabilang ang isang limang taong gulang na bata. Dapat managot ang lahat ng sangkot sa kapabayaang ito, mula sa contractors hanggang sa mga opisyal na pumirma at nag-apruba ng proyektong ito,” dagdag nito.

Nanawagan din ito na magsagawa ng agarang rebyu sa lahat ng kahalintulad na safety infrastructure sa mga public facilities sa buong bansa.

“Sa kabila ng bilyun-bilyong pondo para sa Build, Build, Build projects, bakit nagkakaroon pa rin ng ganitong uri ng kapabayaan? Ang korapsyon sa mga proyektong pampubliko ay direktang naglalagay sa panganib sa buhay ng ating mga mamamayan,” pagtatapos ni Brosas. (Vina de Guzman)

NANGAKO si Pangulong Ferdinand Marcos Jr. na hindi na mauulit ang kalunus-lunos na road accidents dahil inatasan na niya ang mga kinauukulang ahensiya ng pamahalaan na magpatupad ng kinakailangang reporma para mapigilan ang pagkawala ng buhay.

Sa kanyang video message, nagpahayag ng kanyang taus-pusong pakikiramay si Pangulong Marcos sa lahat ng pamilya na nawalan ng mahal sa buhay at sa mga nasaktan sa kamakailan lamang na aksidente sa SCTEX toll plaza at NAIA Terminal 1.

“These incidents should never have happened. And now, we will ensure they never happen again,” ayon kay Pangulong Marcos.

Sa katunayan aniya ay inatasan na niya si Transportation Secretary Vince Dizon na gumalaw nang tiyak partikular na ang tukuyin at papanagutin ang mga responsable sa aksidente.

Nais din ni Pangulong Marcos na maglagay ng kinakailangang reporma para mapigilan ang pagkawala ng buhay.

Kabilang aniya sa ipatutupad ng gobyerno ang pagrerepaso ng

‘driver licensing’ upang masiguro na “only fit, capable, and responsible individuals” maging ito man ay magda-drive sa publiko o pribadong sasakyan ang papayagan sa lansagan; isang pambansang audit ng bus operators, na may malinaw na parusa para sa mga mabibigong tumalima sa ‘safety at maintenance standards’; at direktiba sa Department of Labor na lansagin ang ‘unsafe at exploitative practices’ sa transport sector dahil ang driver fatigue, long hours, at pressure’ para ma-meet ang quota ay dapat na hindi nailalagay ang buhay sa panganib.

Ipinangako rin ni Pangulong Marcos na ang buhay ng mga biktima ay hindi dapat nawawala dahil lamang sa walang kapararakan o walang kabuluhan

”We owe it to the victims and their families to act—not only with sympathy, but with resolve,” ayon sa Chief Executive.

”We will make the changes that need to be made. We will demand accountability where it is due. And we will build a transport system that truly protects Filipino people,” aniya pa rin.

Sa ulat, 10 indibiduwal kabilang na ang apat na bata, ang nasawi sa isang multiple-vehicle collision sa Tarlac City Toll Plaza sa Subic-Clark-Tarlac Expressway, noong nakaraang Huwebes.

Dalawang iba pang indibiduwal ang nasawi, araw ng Linggo nang araruhin ng SUV ang departure area ng Ninoy Aquino International Airport (NAIA) Terminal 1. ( Daris Jose)

NABISTO ang dalang baril ng isang rider nang sumemplang makaraang tangkain takasan ang mga pulis na nagsasagawa ng Oplan Sita dahil sa hindi pagsuot ng helmet sa Caloocan City, kamakalawa ng hapon.

          Ayon kay Caloocan police chief P/Col. Paul Jady Doles, habang nagsasagawa ng Oplan Sita ang mga tauhan ng Tactical Motorcycle Riding Unit (TMRU) North, Sector 1, sa P. Dela Cruz, Sitio Gitna, Brgy. 166, nang parahin nila ang isang rider dahil walang suot na helmet.

          Sa halip na huminto, biglang pinaharurot ng rider ang minamanehong motorsiklo subalit, nawalan siya ng control na naging dahilan ng kanyang pagsemplang at pagkakaaresto sa kanya.

          Nang kapkapan, nasamsam ng mga pulis sa loob ng kanyang belt bag ang isang kalibre .38 revolver na kargado ng limang bala at nang hanapan siya ng kaukulang dokumento hinggil sa legalidad nito ay wala din naipakita ang suspek.

          Kinumpiska din ng pulisya ang gamit na motorsiklo ng suspek na mahaharap sa mga kasong paglabag sa Article 151 of the Revised Penal Code (Disobedience to Authority) at R.A. 10591 (Comprehensive Firearms and Ammunition Regulation Act) in relation Omnibus Election Code.

Pinapurihan naman P/BGen. Josefino Ligan, District Director ng Northern Police District, ang Caloocan City Police Station para sa kanilang mabilis na pagkilos at dedikasyon sa pagtataguyod ng kaligtasan ng publiko. (Richard Mesa)

ARESTADO ang isang lalaki na akusado sa pangmomolestiya sa isang menor-de-edad matapos matunton ng pulisya sa kanyang pinagtataguang lugar sa Caloocan City.

          Sa kanyang report kay Northern Police District (NPD) District Director P/BGen. Josefino Ligan, sinabi ni Caloocan police chief P/Col. Paul Jady Doles na nakatanggap sila ng impormasyon hinggil sa tinutuluyang lugar ng 38-anyos na akusado na nakatala bilang No. 8 Top Most Wanted Person sa lungsod.

          Dakong ala-1:45 ng madaling araw nang masukol tumutugis na mga operatiba ng Warrant and Subpoena Section ng Caloocan police ang akusado sa Abbey Road 2, Barangay 73.

          Dinakip ang akusado sa bisa ng warrant of arrest na inisyu noong April 10, 2025 ng Caloocan City Regional Trial Court, Branch 1 para sa kasong Acts of Lasciviousness under Article 336 of the Revised Penal Code in relation to Section 5(b) of RA 7610 na may inirekomendang piyansa na P180,000.

          Pansamantalang nakapiit ang akusado sa Caloocan police Investigation and Detective Management Section – Warrant and Subpoena Section (IDMS-WSS) habang hinihintay ang pagpapalabas ng commitment order mula sa korte para sa paglilipat sa kanya sa City Jail. (Richard Mesa)

NANAWAGAN si Representative Brian Raymund Yamsuan sa Department of Labor and Employment (DOLE) na protekatahan ang mga manggagawa mula sa nakakaalarmang pagtaas sa bilang ng mga nabibiktima ng online investment scams at iba pang uri ng digital fraud sa pamamagitan ng pagtuturo sa kanila kung papaano mag-invest ng kanilang pinaghirapang pera at matukoy ang mga bogus na financial schemes.

Ngayong gamit na gamit ng mga scammers ang artificial intelligence (AI)-generated tools para makapangloko, sinabi ni Yamsuan na maraming Pilipino ang mga nabibiktima sa ganitong uri ng investment fraud.

Sa ginawang independent estimates, makikita na ang average loss ay nasa P45,000 mula sa ganitong scams.

“The DOLE can team up with the Bangko Sentral ng Pilipinas (BSP) and the Department of Trade and Industry (DTI) to spearhead a campaign that would make user-friendly financial literacy materials readily accessible to the public through various communication platforms,” ani Yamsuan.

 Kabilang sa AI-powered scams na patuloy na namamayagpag sa social media ay fake investment opportunities na ini-endorso umano ng malalaking kumpanya gamit ang deepfake technology upang lumitaw na isinusulong ang pekeng investment schemes na nangangalap ng minimum funding na may mataas na returns o

balik ng pera.

 “Kung ang mga scammer ay kayang magpakalat sa social media ng mga posts at videos tungkol sa mga pekeng investments na too good to be true dahil ang pang-akit nila ay mabilis lalaki ang pera mo, dapat ay mas kaya ng mga ahensya ng gobyerno na magsanib puwersa para ma-kontra ang mga ito sa pamamagitan ng pamamahagi ng mga financial literacy materials online,” dagdag ni Yamsuan.

Ipinanukala pa ni Yamsuan sa DOLE na mabigay ng insentibo sa mga empleyado na magsasagawa ng financial literacy seminars sa mga workers. (Vina de Guzman)

DAPAT munang pag-aralang mabuti ang hirit ng Department of Transportation (DOTr) na magsagawa ng regular drug testing para sa mga drivers ng pampublikong transportasyon.

Ito’y matapos ang sunud-sunod na aksidente ng mga sasakyan na kumitil na rin sa buhay ng ilang indibidwal.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na dapat din kasing isaalang-alang ang kaligtasan ng mga drivers at mga mananakay.

“So, pag-aaralan pa rin po ito at huwag naman po natin agad husgahan na ito ay isang money-making device or strategy,” ang sinabi ni Castro.

”Dapat pong pag-aralan, kasi ito po ay kailangan din po. Tandaan po natin ang inaalagaan po dito iyong safety po ng commuters, ng mga passenger, ng mga tao na gumagamit ng kalsada, including na rin po iyong mga drivers, hindi po ito basta-basta maaaring sabihin na huwag na lang gawin kung ito naman po ay makakasama sa safety,” ang dagdag na pahayag ni Castro.

Nauna rito, sinabi ni PISTON President Ka Mody Floranda, dapat ay hindi ito maging mandatory ang drug testing.

Kaakibat umano rin kasi nito ang usaping pinansyal.

Una nang sinabi ng DOTr na ang mga operator ang magsho-shoulder ng gastusin para sa drug testing.

Sinabi naman ni Transportation Secretary Vince Dizon na makikipagtulungan ang Department of Transportation (DOTr), Land Transportation Office (LTO), and Land Transportation Franchising and Regulatory Board (LTFRB) at Philippine Drug Enforcement Agency (PDEA) sa pagpapatupad ng kautusan.

Tinuran pa nito na ang mandatory drug testing ay magiging regular basis at isasagawa bawat 90 araw.

Isinagawa ni Dizon ang anunsyong ito sa layunin na ayusin ang “broken system” sa bansa at gawing ligtas ang mga tao sa lansangan. (Daris Jose)

OPISYAL nang idineklara ni Pangulong Ferdinand Marcos Jr., na Special (Non-Working) Holiday sa buong bansa ang May 12, araw ng halalan.

Nakasaad sa Procamation No. 878, na layon nito na bigyang-daan ang mga tao na gamitin ng maayos ang kanilang karapatan na bumoto.

Si Presidential Communications Office (PCO) Undersecretary at Palace Press Officer Claire Castro ang nagbigay ng kopya ng proklamasyon na pirmado ng Executive Secretary Lucas P. Bersamin, na may pahintulot na rin ni Pangulong Marcos.

Nauna rito, hiniling na ng Commission on Elections (Comelec) kay Pangulong Ferdinand Marcos Jr. na ideklara bilang holiday ang araw ng halalan sa May 12.

Sa isang panayam, sinabi ni Comelec Chairman George Erwin Garcia na ito ay upang magkaroon ng pagkakataon ang publiko na makaboto sa midterm elections.

Marami kasi aniyang may pasok sa mismong araw ng eleksiyon kaya makakatulong kung idedeklara itong holiday.

Ayon kay Garcia, kailangang maglabas ng opisyal na proklamasyon ng Malacañang na nagdedeklarang holiday sa May 12. ( Daris Jose)