PORMAL na nanumpa sa kanilang tungkulin sina Malabon City Mayor Jeannie Sandoval, at Vice Mayor Edward Nolasco, kasama ang mga miyembro ng Sangguniang Panlungsod sa isang simbolikong seremonya Lunes ng umaga sa Malabon  Sports Complex.

Sa temang “Isang Bagong Yugto, Iisang Layunin”, pormal na nagsimula sa kanilang tungkulin at responsibilidad ang mga bagong halal na opisyal at mga nahalal muli, bitbit ang pangakong pagkakaloob ng serbisyong may integridad, pananagutan, at bukas sa mata ng publiko.

“Naririto po ang mga lingkod bayan na makakasama natin sa ating pag-abot ng ating mga layunin. Magkakasama, kapit-bisig, para sa mas maunlad, mas inklusibo, at mas magandang kinabukasan para sa Malabon. Makakasiguro po kayo na tayo ay patuloy na maglilingkod ng tunay, tapat, at nararamdaman,” pahayag ni Mayor Jeannie sa kanyang mensahe.

Sa harap ni Malabon Regional Trial Court (RTC) Executive Judge Rosario G. Inez-Pinzon nanumpa si Mayor Jeannie, na sinaksihan ni First Gentleman Ricky Sandoval at kanilang pamilya habang sa kanya naman nanumpa si Vice Mayor Nolasco at mga halal na konsehal.

Kabilang sa First District Councilors sina Maricar Torres, Ian Emmanuel Borja, Leslie Yambao, Paulo Oreta, Gerry Bernardo, at Payapa Ona habang sa 2nd District sina Nadja Marie Vicencio, Jasper Cruz, Len Yanga, at Rom Cunanan.

Dumalo naman sa naturang seremonya ang lahat ng mga pinuno ng mga departamento, kawani, kinatawan ng ahensiya ng national government, iba’t-ibang organisasyon, at mga residente ng lungsod.

Malugod na pinasalamatan ni Mayor Jeannie ang Malabuenos sa kanilang tiwala at suporta, kasabay ng pangakong ipagpapatuloy ang pagbibigay ng wasto at totoong serbisyo para sa lahat. (Richard Mesa)

KASABAY ng pagdiriwang ika-18th Cityhood Anniversary ng Navotas, nagningning ang gabi ng parangal sa mga nagwagi sa 7th Navoteño Film Festival (NFF) na nagtapos sa isang powerful showcase ng youth-driven films kung saan tampok sa mga pelikula ang papel ng mga senior citizens sa paghubog ng Navotas.

Ayon kay Mayor John Rey Tiangco, may temang “Senior: Lakas ng Nakaraan, Gabay ng Kinabukasan,” ang festival kung paano patuloy na ginagabayan at naiimpluwensyahan ng mga matatanda ang susunod na mga henerasyon. (Richard Mesa)

MINARKAHAN ng Lungsod ng Navotas ang ika-18 Cityhood Anniversary nito sa pamamagitan ng paglagda sa isang Memorandum of Agreement, kasama ang 35 bagong scholars nito.

Pormal na ginawa ni Mayor John Rey Tiangco ang scholarship grants para sa School Year 2025–2026 sa isang ceremonial MOA signing kasama ang bagong batch ng NavotaAs scholars.

Kabilang sa grupo ang 15 high school scholars, pitong qualified para sa Navotas Polytechnic College, isang merit awardee, dalawa sa ilalim ng teacher scholarship program, at 10 beneficiaries ng Ulirang Pamilyang Mangingisda Scholarship.

“More than just financial aid, what we aim to give is hope,” ani Mayor Tiangco.

“We believe education is a tool for success and a key that opens the door to your dreams. This MOA is not just a contract—it’s a shared vision for a Navotas with more professionals, empowered youth ready to lead and serve, and families with the means to thrive,” dagdag niya.

Naging lungsod ang Navotas sa pamamagitan ng Republic Act No. 9387, na nilagdaan bilang batas noong March 10, 2007. (Richard Mesa)

MAGDEDEKLARA ng City Public Health Health Emergency ang lungsod ng Maynila dahil sa posibleng sakit na idudulot gawa nang hindi nahahakot na basura nitong mga nagdaang linggo.

Sa ginanap kauna-unahang preskon ng bagong upong si Manila Mayor Isko Moreno sinabi nito na hindi nahakot ng Metro Waste Solid Waste Management Corporation at Phileco ang mga nakatambak na basura sa lungsod matapos na hindi nabayaran ang kanilang serbisyo.

Nangangamba si Isko na posibleng magdudulot ng sakit sa mga residente sa lungsod ang ga-bundok na iniwanang basura kung hindi kaagad mahahakot.

Ang Metro Waste at Phileco ang mga kinontratang maghakot ng basura sa Lungsod ng Maynila sa panahon ni dating Manila Mayor Honey Lacuna.

Nabatid na hindi na nabayaran ang Metro Waste mula February 20 hanggang sa kasalukuyan habang mula June 30, 2025 hanggang sa kasalukuyan ang Phileco .

Lumalabas na umaabot sa P950 million ang hindi nabayaran sa dating pamahalaan sa dalawang inatasang maghakot ng basura.

Magsisimula ang paghahakot ng basura ngayon alas-2:00 ng hapon at hindi titigil hanggang hindi nahahakot ng Leonel Management na siyang pinakiusapan na magtanggal ng mga basura na walang gastos ang pamahalaan.

Maging ang Metro Manila Development Authority ay pinakiusapan din na tumulong sa paghahakot. (Gene Adsuara)

PORMAL nang inilunsad ng National Housing Authority (NHA) at ng Department of Agriculture (DA) ang kauna-unahang KADIWA ng Pangulo (KNP) sa NHA Livelihood Training Facility, Northville 1, Barangay Bignay, Valenzuela City.

Sa direktiba ni General Manager Joeben A. Tai, pinangunahan ni Assistant General Manager Alvin S. Feliciano ang ribbon-cutting ceremony, kasama sina DA Assistant Secretary for Agribusiness, Marketing, and Consumer Affairs, at KADIWA Program Head Atty. Genevieve E. Velicaria-Gueverra, na kumatawan kay Secretary Francisco Tiu Laurel Jr., at si NHA NCR-North Sector Regional Manager Engr. Jovita G. Panopio.

Layunin ng KNP na itaguyod ang food security sa bansa sa pamamagitan ng paghahatid ng abot-kaya at sariwang produktong agrikultural sa mga mamimiling nangangailangan, gayundin ang pagsuporta sa mga lokal na magsasaka sa pamamagitan ng pagpapatatag ng kanilang kabuhayan.

Ipinahayag ni AGM Feliciano ang suporta ng NHA, sa ilalim ng pamumuno ni GM Tai, sa mga programa ng kasalukuyang administrasyon at ang layunin nitong makamit ang food accessibility, lalo na para sa masa para maihatid ang bisyon ng Masaganang Bagong Pilipinas.

“Ang pagbibigay ng mga tahanan ay mahalaga, ngunit ang tunay na pag-unlad ng komunidad ay higit pa sa tirahan. Dapat ding maisama ang sustainable food systems, mga livelihood opportunity, maging ang aspeto ng economic stability,” pahayag ni AGM Feliciano sa kanyang mensahe.

Halos 1000 indibidwal naman ang nagkaroon ng pagkakataong makabili ng iba’t ibang agri-commodities tulad ng bigas sa halagang Php 20 kada kilo para sa mga vulnerable sectors na PWD, solo parents, at senior citizens, at Php 35 pataas para sa iba pang bigas; locally produced highland and lowland crops, mga spices, fresh produce, karne at iba pang processed products, maging mga delicacies at desserts na ibinenta sa patas na halaga.

Kung matatandaan ay isang Memorandum of Understanding (MOU) ang nilagdaan sa pagitan ng NHA at DA noong Marso 20, 2025. Layon ng MOU na patatagin ang pagtutulungan ng dalawang ahensya at magtatag ng iba’t ibang KNP sa lahat ng resettlement projects ng NHA.

Ang pagtatatag ng KADIWA ni Pangulo sa mga resettlement sites ay isa sa mga pangunahing programa ng NHA, kaugnay ng ika-50 charter anniversary nito ngayong taon. Sa positibong pagtanggap ng mga benepisyaryo, target ng parehong ahensiya na magtayo pa ng mas maraming KNP sa iba pang pabahay sa mga susunod na araw. (PAUL JOHN REYES)