ASEC MENDOZA, iniutos sa LTO REGION 7 na maglabas ng suspension order laban sa mga enforcer sa Bohol viral video

INIUTOS ni Land Transportation Office (LTO) Chief, Assistant Secretary Atty. Vigor D. Mendoza II nitong Sabado March 1, sa regional director ng LTO Region 7 na maglabas ng preventive suspension order laban sa mga enforcer na sangkot sa viral video sa Bohol.

Ayon kay Asec Mendoza, ang ipinag-utos na preventive suspension ni DOTr Secretary Vince Dizon ay kailangang ipatupad kaagad at mananatiling epektibo hanggang sa matapos ang masusing imbestigasyon.

“Ang aking direktiba ay tapusin ang imbestigasyon sa lalong madaling panahon upang matukoy ang katotohanan, alamin kung may anumang pagkukulang, at tiyaking mapanagot ang sinumang may responsibilidad,” ani Asec Mendoza.

Noong Biyernes, February 28, kumalat sa social media ang isang video na umano’y nagpapakita ng mga enforcer ng LTO na nangmamaltrato sa isang motorcycle rider sa Panglao.

Agad nang ipinag-utos ni Secretary Dizon ang preventive suspension sa lahat ng LTO personnel na sangkot sa insidente sa Panglao, Bohol, at tiniyak ang masusing pagsisiyasat sa pangyayari.

“Mananatili itong epektibo habang hindi pa natatapos ang isang komprehensibo at patas na imbestigasyon sa insidente,” ayon sa DOTr kaugnay ng suspension order.

Samantala, inatasan din ni Asec Mendoza si LTO Region 7 Director Glen Galario na makipagtulungan sa investigating team na binuo ni Secretary Dizon.

Nagpahayag naman ng paghingi ng paumanhin si Asec Mendoza sa insidente at tiniyak na magpapatupad ng mga kaukulang hakbang upang maiwasang maulit ang ganitong pangyayari sa hinaharap. (PAUL JOHN REYES)