BAKUNA KONTRA COVID-19

BAGONG pangalan sa parehong sakit ang ibinigay ng World Health Organization (WHO) sa 2019 novel coronavirus acute respiratory disease (2019 nCoV ARD).

Ayon sa WHO, “COVID-19” na ang magiging opisyal na tawag sa nakamamatay na sakit — CO para sa corona, VI sa virus at ang D ay disease.

Kasabay nito ang pahayag na magkakaroon na ng pagkakataong mapahinto ang paglaganap nito dahil sa susunod na 18 buwan ay maaari umanong handa na ang bakuna laban sa sakit. Masasabi nating magandang balita ito pero, sa loob ng isa’t kalahating taon, ilan na kaya ang kasong maitatala? Ilan na ang namatay at gaano na kalala ang sitwasyon?

Batay sa pinakahuling report, sa nakalipas na magdamag ay nakapagtala ng 94 panibagong bilang ng mga nasawi sa Hubei Province sa China dahil sa COVID-19.

Umakyat naman sa 44,789 ang naitalang kaso ng sakit sa buong mundo. Malaking bilang nito o 44,311 ay naitala sa China. Sa ganitong mga bilang, ang sakit sa dibdib na i-compute pa ang posibleng kabuuan matapos ang 18 buwan at huwag naman sanang umabot sa ganu’ng sitwasyon.

Sana, ‘yung mga report na nagpositbo sa COVID-19 at gumaling ay isama rin sa pag-aaral at tutukan ang mga posibleng dahilan kung paano sila naka-recover saka gamitin sa ibang pasyente.

Kung maituturing nang public enemy number 1 ang COVID-19, na ayon na rin sa WHO ay mas matindi pa raw ang epekto nito kaysa sa terorismo, ang puwersa at pagkakaisa na ng buong mundo ang kailangan.

Hindi lang ito laban ng China at ng iilang bansa, tawagin man itong Wuhan coronavirus, nCoV, 2019 nCoV ARD o COVID-19, hindi magbabago na ito ay sakit na nakamamatay na dapat nang lunasan sa lalong madaling panahon.