• May 13, 2025
  • Search in People's Balita

  • Ang Diyaryong Pinagkakatiwalaan

 

BINAY, ZAMORA, INIREKLAMO SA COMELEC SA VOTE-BUYING

ISANG reklamo ang inihain sa Commission on Elections (COMELEC) laban kina Makati Mayor at tumatakbong senador Mar-Len Abigail “Abby” Binay at Taguig 2nd District Representative Amparo Maria “Pammy” Zamora dahil umano sa sabwatan nila sa pamimili ng boto sa isang campaign rally na ginanap sa Barangay Cembo noong Abril 10, 2025.
Nilabag umano nina Binay at Zamora ang Section 261 (a) at (b) ng Omnibus Election Code at Section 26 (p) ng COMELEC Resolution No. 11104 na mahigpit na nagbabawal sa pamimili ng boto at pakikipagsabwatan upang impluwensyahan ang desisyon ng mga botante gamit ang pera o anumang benepisyo.
Batay sa sinumpaang salaysay ng nagreklamo, ipinakilala ni Binay si Zamora sa rally bilang kanyang “counterpart sa Kongreso” at pabirong sinabi: “So mamaya po, magsasalita po si Cong. Pammy, papakitaan niya kayo ng mga limpak-limpak niyang pera dahil marami siyang pondo. Hehehehe. Yari ka, Pammy.”
Hindi naman ito kinontra ni Zamora na ngumiti lamang  bagay na pagpapakita ng pangsang-ayon at nagbigay ito ng ideya sa mga tagapakinig na may gantimpala kapalit ng suporta sa darating na halalan.
Binigyang-diin sa reklamo na hindi kailangan ng aktwal na pamimigay ng pera upang masabing nagkaroon ng vote-buying dahil ang  pag-aalok, pagbanggit, o pangakong may kaugnayan sa pera o benepisyo ay isa ng  paglabag sa batas. Ang pahayag ni Binay at ang tugon ni Zamora ay ginamit na batayan upang ipakita ang pagkakaroon ng sabwatan.
“Itong malinaw na pagpapalitan ng mensahe ay tahasang paglabag sa batas at pagsubok na impluwensyahan ang resulta ng eleksyon,” ani ng nagsampa ng reklamo. Binanggit din sa reklamo ang mga naunang desisyon ng korte na nagpapakita na sapat na ang sabwatan para masabing may krimen kahit walang pisikal na pamimigay ng pera. (Gene Adsuara)
Other News

  • Jeepney driver, kinatok ni kamatayan

    DUGUANG humandusay sa harap ng kanyang kinakasama ang katawan ng 34-anyos na jeepney driver matapos katukin at pagbabarilin ng dalawang hindi kilalang mga suspek sa Caloocan City, Lunes ng madaling araw. Dead-on-the-spot sanhi ng tinamong tama ng bala sa ulo at katawan ang biktimang si alyas ‘John Bryan’ habang patuloy naman ang follow-up operation ng mga […]

    read more

  • 4, arestado sa sinalakay na kompanyang nagbebenta ng mga imitasyong piyesa ng motor sa Caloocan

    Apat na kawani ang arestado matapos salakayin ng pulisya ang isang kompanyang nagbebenta ng pekeng piyesa ng motorsiklo sa Caloocan. Nakumpiska ang 120 kahon ng imitasyong bearing na tinatayang nagkakahalaga ng P1.5M. Sasampahan ng kasong paglabag sa Intellectual Property Code ang mga nadakip.    

    read more

  • Nasita sa city ordinance, binata buking sa shabu

    KULUNGAN ang kinasadlakan ng isang binata matapos makuhanan ng shabu makaraang tangkain takasan ang mga pulis na sumita sa kanya dahil sa paglabag sa city ordinace sa Valenzuela City, kamakalawa ng hapon.     Kinilala ni Valenzuela police Sub-Station 2 Commander P/Major Randy Llanderal ang suspek bilang si Christian Santiago, 30, construction worker ng 6111 […]

    read more
People's Balita.
All rights reserved. © Copyright 2025.