Caloocan, naglunsad ng libreng bakuna para sa mga estudyante

OPISYAL na inilunsad ng Pamahalaang Lungsod ng Caloocan, sa pamamagitan ng City Health Department (CHD) at sa pakikipagtulungan ng Schools Division Office (SDO) ang immunization program na nakabase sa Caloocan High School.

Layunin ng nasabing programa na mabakunahan ang mga mag-aaral mula grade 1, 4, at 7 para palakasin ang resistensya ng mga bata laban sa iba’t ibang nakakahawang sakit tulad ng tigdas, rubella, tetanus, diphtheria, at human papilloma virus.

Hinikayat ni Mayor Dale Gonzalo “Along” Malapitan ang mga magulang na payagan ang kanilang mga anak na ma-inoculated at tiniyak niya sa lahat na ligtas at mabisa ang nasabing bakuna.

“Sa atin pong mga magulang, inaanyayahan ko po kayong lahat na pabakunahan na ang inyong mga anak upang matiyak nating lahat na maayos ang kalusugan ng ating mga mag-aaral at maiwasan ang pagkalat ng anumang sakit na maaaring makaapekto sa kanilang pag-aaral,” ani Mayor Along.

“Tinitiyak ko rin po na ang mga bakunang ito ay ligtas para sa mga bata at walang kakaibang side effects, batay na rin po sa paniniguro ng mga doktor at iba pang eksperto,” dagdag niya.

Kinilala rin ng alkalde ang kahinaan ng mga bata sa iba’t ibang uri ng sakit at nangakong patuloy na magpapatupad ng mga programang pangkalusugan upang matiyak na lumaki silang malusog sa lahat ng aspeto. (Richard Mesa)