‘Di pa rin ma-digest ang pagkapanalo ng Best Actress: JUDY ANN, baka after ten years bago ulit sumali sa isang festival

TINANONG namin si Judy Ann Santos nang nakausap namin sa Thanksgiving lunch para sa buong team ng ‘Espantaho’ sa Chef Jessie Rockwell Club sa Makati, kung nag-sink in na ba sa kanya ang pagkapanalo niya ng Best Actress sa nakaraang 50th Metro Manila Film Festival.

Sagot ng aktres, “Alam mo, sa totoo, kahit sabihin nilang charot-charot, hindi pa talaga. “Parang umaalingawngaw pa sa akin yung pagtawag sa pangalan ko, yung ang blurred nung mga pangyayari. 

“Parang pag bumabalik ako doon sa moment na yun, kahit yung time na nakasakay na ako ng sasakyan pauwi, yung, ‘Totoo ba ito? Totoo ba talaga ito?’

“Tapos kalung-kalong ko yung award, yung trophy, na parang tinititigan ko, na parang, ‘Ay oo, ang bigat nga! Akin ba talaga ito?’

“Nandun e, yung hanggang ngayon hindi pa rin ako makapaniwala na sa sampung pelikula… ‘though we had a lot of nominations, nakapag-uwi pa kami ng isa.

“And palagi kong sinasabing ‘kami’ kasi hindi naman mabubuo yung ‘Espantaho’ kundi sa kabuuan ng produksiyon, ng staff, ng crew, ng lahat ng cast.”

Pagpapatuloy pa niya, “ito yung mga bagay na alam kong hindi ko ito maiuuwi kung hindi dahil of course kay direk Chito, sa materyal ni direk Chris, sa tiwala ni Atty. Jojit, at sa powerhouse cast ng Espantaho kasi naggabayan talaga kami. 

“Hindi ko pa rin talaga alam kung ano’ng sasabihin ko e, kasi parang hindi siya totoo.

“Yung nangyari ba talaga ito? Seryoso ba ito? Sabihin na nilang ang arte-arte ko.

“Hindi ko pa lang talaga ma-digest ba, na nangyari siya sa akin. But of course, of course, sobra akong grateful sa jury, sa lahat, sa lahat-lahat ng bumoto for me to be 2024 Best Actress sa Metro Manila Film Festival.

“Sobrang laki ng gratefulness ko, pero hindi ko rin talaga alam kung sapat pa rin ba yung trabaho ko, kasi hindi nga ako magandang gauge ng sarili kong mga proyekto.

“But then again, nandun ako sa okay lang naman din na hindi ako naliligayahan sa trabaho ko, kasi ibig sabihin binibigyan ko pa rin ng malaking espasyo yung skills ko sa pagiging artista, na mayroon pa akong room for improvement and ina-address ko yun. 

“Alam ko sa sarili ko na hindi sapat na hanggang dito lang ako, so I’m still willing to learn. I’m still excited to work with new directors and new writers, of course veteran actors, directors and writers, kasama naman sa pangkalahatan yun.

“Pero again, kung tatanungin mo kung kailan ko ito mada-digest? Hindi ko alam. 

“Parang gusto ko munang panghawakan itong trophy na ito in the next 10 years bago ako ulit sumali sa isang festival.” 

Milestone ang pagwawagi ni Judy Ann dahil ika-50th anniversary ng MMFF kaya binsagan siyang “Golden Best Actress”.

“Kaya nga. Siguro kaya hindi ko siya ma-digest, kasi parang history na, history pa,” say pa ni Juday. 

“Talagang ang dami kasi talagang…napakaraming magagaling. “Hindi naman kayo makakapasok sa 50th MMFF kung hindi mahuhusay lahat ng pelikula, hindi ba? 

“So to be singled out with the other actors or participants at ikaw ang makapag-uwi nung final award na iyon nung gabing yun… well actually, hindi pala final kasi best picture pala yung final. 

“Iba. Iba yung… kaya lutang ako nung sinabi ni Atty, ‘Halika na, umuwi na tayo’, tayo naman ako, umuwi na… hindi na ako naghintay ng kung ano pa man kasi talagang lutang na lutang ako. 

“Hindi ko alam kung saan ako pupunta, ano’ng mangyayari? Anong gagawin? 

“Pagdating nga namin sa bahay, parang tulala pa rin ako, na parang nagising ako, humarap ako… hinanap ko kaagad yung award ko kasi baka nga nananaginip lang ako,” at muling tumawa ang aktres. 

“Saan ko ba siya nilagay? Nasaan ba ito? Pati yung envelope, hinanap ko pa, kasi feeling ko hindi talaga siya totoo.

“Pero thank you Lord, totoo,” bulalas pa ni Judy Ann. 

“Ang sarap, ang saya ng pagtatapos ng 2024, tapos napakasarap ng opening ng 2025 ko. So thank you Lord, thank you universe, nandito lang ako para mag-abang sa kung ano pang ibibigay sa akin ng Panginoon for this year.”

***

SI Rams David na yata ang talent manager na may pinakamaraming alagang talents.

As in hindi na namin mabilang kung ilang artists ng kanyang Artist Circle management ang nakasalamuha namin sa annual Thanksgiving party ng kanyang kumpanya kamakailan.

Ka-table namin ang dating sexy actor na ngayon ay nagbabalik bilang character actor na si Ernie Garcia, at ang character actress na si Melissa Mendez.

Nasa katabing table naman namin sa ballroom ng Prime Hotel ang hunk actor na si Troy Montero na crush namin. Yes, bagong addition sa roster of talents ni Rams si Troy.

Kasama ni Troy sa mesa ang isa sa mga loyal artists ni Rams, ang aktres na si Sheryl Cruz na always friendly. Ang ganda ni Sheryl noong gabing iyon.

Sina Inday Garutay at Billy Gandoza na bukod sa guapo ay mahusay mag-host ang bumangka sa mga parlor games kung saan isa sa mga big winners ay si John “Sweet” Lapus na special guest sa party kahit hindi alaga ni Rams; close friends kasi sila.

In attendance  siyempre sina Shyr Valdez, Dang Cruz, BJ “Tolits” Forbes, Mico Aytona, Marc Solis, Jet Rai, ang mag-asawang Jan Marini at Gerard Pizzaras, at ang mga Sexbomb girls na sina Aifah Medina at Monic Icban na may pasabog na dance number with Joy Cancio, ang orihinal na SexBomb girl.

Dumalo rin ang pretty na si Jess Martinez fresh from her ‘Abot Kamay Na Pangarap’ stint.

Sayang at hindi nakadalo si Wilma Doesnt dahil may taping at si Chanda Romero na hindi tuloy namin nainterbyu tungkol sa pananalo ni Kakkie Teodoro ng ‘Isang Himala’ over Chanda ng ‘Espantaho.’

Nasa Thanksgiving party rin siyempre sina Mosang, Eagle Riggs, ang youngstars na sina Rikki Mae Davao at Prince Keino Encelan, ay marami pang iba.

At taun-taon, nakaugalian na ni Noreen Divina, na may-ari ng Nailandia Nail Salon & Spa at Skinlandia beauty and wellness clinic (sa SM Fairview), ang palaging pagdadala ng premyo para sa grand raffle draw.

Matalik na magkaibigan sina Noreen at Rams kaya naman palaging nakasuporta ang dalawa sa isa’t-isa.

That night ay muli naming na-meet ang butihing ina ni Jess na dati na naming nakilala noon sa taping ni Jess para sa Abot Kamay Na Pangarap, bagets si madir, para lamang siyang ate ni Jess.

At si Jess naman, habang lumilipas ang mga araw ay lalong gumaganda, at dinig namin, maraming projects na ang nakalinya para sa kanya si Rams.

Anyways, this 2025 ay aasahang patuloy na aalagwa ang career at karaketan ng mga talents ng Artist Circle dahil na rin sa husay at sipag ni Rams.

(ROMMEL L. GONZALES)