DOH, nagbabala vs heat-related illnesses ngayong tag-init

BINALAAN (DOH) ang publiko laban sa mga heat-related illnesses nitong Lunes, kasunod na rin nang unti-unti nang pag-init ng temperatura sa bansa dahil sa papalapit na summer season.

Partikular na tinukoy ng DOH ang heat cramps, heat exhaustion, at heat stroke, na dapat na iwasan ng publiko.

“Ang ganitong mga temperatura ay maa­aring humantong sa heat cramps o pamumulikat at heat exhaustion o pagkahapo na may mga sintomas tulad ng pagkapagod, pagkahilo, sakit ng ulo, [at] pagsusuka,” ayon kay DOH spokesperson Assistant Secretary Albert Domingo.

Babala pa niya, “Ang matagal na pagkakalantad sa init ay nagpapataas ng posibilidad ng heat stroke, isang seryosong kondisyon na may pagkawala ng malay, pagkalito o kaya ay mga seizure, kumbulsyon na maaaring makamatay kung hindi ginagamot.”

Anang DOH, dapat na dalhin sa malamig o malilim na lugar ang pasyente at unti-unting painumin ng malamig na tubig.

Maaari anilang hubarin ang damit nito na maaaring makadagdag sa init at lagyan ito ng cold compress, ice pack, malamig na tubig o malamig na basang panyo sa katawan, partikular na sa ulo, mukha, leeg, kilikili, pulso, bukung-bukong at singit.

Mas makabubuti rin kung kaagad itong dalhin sa pagamutan upang malapatan ng kaukulang lunas.

Pinayuhan naman ni Domingo ang publiko na regular na subaybayan ang mga ulat mula sa PAGASA hinggil sa lagay ng temperatura.