Imprenta ng balota sa midterm polls 92% na

NASA 92% na ng mga balotang gagamitin para sa May 12 National and Local Elections (NLE) ang natapos nang iimprenta ng Commission on Elections (Comelec).

Ayon kay Comelec chairman George Erwin Garcia, ito ay katumbas ng nasa 61 milyon hanggang 62 milyong balota na natapos nang iimprenta.

Dahil dito, aabot na lamang aniya sa halos anim na milyong balota ang kailangan pa nilang iimprenta sa mga susunod na araw.

Sinabi pa ni Garcia na sa naturang bilang ng mga balotang naiimprenta na, 37 milyon na ang natapos nang beripikahin.

“Nasa 92 percent na po kami. Almost 6 million na lang ang kaila­ngan imprenta. Verified sa kasalukuyan ay nasa 36 to 37 million na balota. Technically maayos naman,” pahayag ni Garcia.

Dagdag pa ni Garcia, kailangan nilang bilisan ang proseso ng pagberipika sa mga balota kaya’t sa sandaling matapos nila ang ballot printing ay gagamitin naman nila ang mga tauhan para sa ballot verification.

Anang poll chief, “On the average, kailangan makapag-verify tayo ng 1.2 million balota on a single day para makaabot kami sa self-imposed deadline para sa distribution ng balota.”

Matatandaang una nang sinabi ni Garcia na umaasa silang matatapos ang ballot printing hanggang Marso 19, na mas maaga sa itinakda nilang deadline na Abril 14.