
HINIKAYAT ng Land Transportation Office (LTO) ang mga motorista na isama ang disiplina sa kalsada at responsableng pagmamaneho sa kanilang New Year’s Resolution para sa 2025, kasabay ng pangakong ipagpapatuloy ang mas pinaigting na operasyon at adbokasiya para sa kaligtasan ng lahat ng gumagamit ng kalsada sa bansa.
Bago matapos ang 2024 ay binalot ng mga malulubhang aksidente sa kalsada, kabilang ang insidente sa Katipunan Flyover na ikinasawi ng apat katao at ikinasugat ng 25 iba pa, pati na rin ang dalawa pang aksidenteng kinasangkutan ng mga trak. Dahil dito, iniutos ni LTO Chief Assistant Secretary Atty. Vigor D. Mendoza II ang pagpapatupad ng mga hakbang para sa kaligtasan sa kalsada.
Kabilang dito ang pag-deploy ng mga enforcer ng LTO sa mga rutang dinadaanan ng mga trak tuwing gabi hanggang madaling araw para sa surprise inspection ng roadworthiness. Mahigit 25 operator ng trak ang nabigyan ng Show Cause Order (SCO) matapos matuklasang ang kanilang mga trak ay gumagamit ng mga sirang gulong.
Iniutos din ni Assec Mendoza sa mga enforcer ng LTO na bigyang-priyoridad ang pag-inspeksyon laban sa overloading, dahil ang sobrang bigat na karga ay nakaaapekto sa brake system at performance ng makina ng sasakyan.
“Marami na ang nagdusa dahil sa mga aksidente. Huwag na sana itong madagdagan dahil bawat buhay ay mahalaga, bawat buhay ay may pamilyang nagmamahal at umaasa,” ani Assec Mendoza.
Iniulat din ng Department of Health (DOH) na mula sa simula ng Christmas break, mayroong 487 na aksidente sa kalsada, kung saan lima ang naitalang nasawi.
Ang Department of Transportation (DOTr) sa pangunguna ni Secretary Jaime J. Bautista ay naglalayong mabawasan ang mga namamatay sa aksidente sa kalsada ng 35 porsyento bago matapos ang termino ni Pangulong Ferdinand “Bongbong” Marcos, Jr.
Pinalakas pa ito ng programang adbokasiya ng LTO na STOP Road Crash, na layong himukin ang mga motorista na tiyakin ang ligtas at responsableng pagmamaneho.
Ayon kay Assec Mendoza, bagama’t nagsasagawa ng operasyon ang LTO para masiguro ang kaligtasan ng lahat ng gumagamit ng kalsada, malaking bahagi ng tagumpay ng adbokasiyang ito ang kooperasyon ng mga motorista at iba pang gumagamit ng kalsada.
“Ang pagmamaneho ng sasakyan ay isang pribilehiyong ibinibigay ng pamahalaan sa kondisyon na dapat itong isagawa nang may responsibilidad at respeto. Hindi lamang ang buhay ng mga motorista ang nasa peligro dahil sa iresponsableng pagmamaneho, kundi pati na rin ang kaligtasan ng mga pedestrian at iba pang gumagamit ng kalsada,” ani Mendoza.
“Kaya iwasan na rin natin pati ang road rage. Marami na tayong naparusahan dahil diyan na nagpapatunay na wala namang mabuting naidudulot ito. Maging responsable at disiplinadong mga drayber tayo.”
“Habang nangangako kami ng mas magandang serbisyo, hinihikayat din namin ang lahat ng aming kliyente na tumulong at makiisa sa aming layunin na gawing ligtas ang lahat ng kalsada sa Pilipinas para sa lahat. Isama natin sa ating New Year’s Resolution ang pagiging disiplinado at responsableng motorista,” diin pa ni Assec Mendoza.
Ipinahayag din ni Assec Mendoza ang kanyang kumpiyansa na mas gaganda pa ang serbisyo ng LTO para sa 2025, batay sa tagumpay ng mga repormang programa ng ahensya ngayong 2024 na nagresulta sa mas mataas na revenue collection at mas mataas na morale ng lahat ng manggagawa ng LTO.
“Marami tayong natutunan ngayong 2024, at kumpiyansa ako na ang lahat ng aral na ito ay magiging susi para sa mas maayos na serbisyo sa 2025,” ani Assec Mendoza. (PAUL JOHN REYES)