LTO, sinimulan ang refresher training program para sa lahat ng enforcer nito sa buong bansa

SINIMULAN ng Land Transportation Office (LTO), sa patnubay ni Department of Transportation (DOTr) Secretary Vince B. Dizon ang refresher training program para sa lahat ng enforcer nito sa buong bansa upang mabigyan sila ng pinakabagong kaalaman at kasanayan sa tamang pagpapatupad ng mga batas at regulasyon sa kaligtasan sa kalsada.

Ayon kay LTO Chief, Assistant Secretary Atty. Vigor D. Mendoza II, ang unang batch ng refresher course ay dinaluhan ng mga enforcer mula sa Central Office at National Capital Region.

Gayunpaman, iginiit niya na isasagawa ito sa lahat ng regional offices ng ahensya at sasaklawin ang mga enforcer hanggang sa district offices.

“Ang inisyatibong ito ay nagsisiguro na ang ating mga tauhan sa LTO ay laging may sapat na kaalaman, kagamitan, at kakayahan sa pagtupad ng kanilang tungkulin,” ani Asec Mendoza.

Tinawag na Retooling Training Program, ang pagsasanay na ito ay idinisenyo upang magbigay ng komprehensibong refresher at pagpapahusay ng kasanayan para sa lahat ng Law Enforcement Personnel ng LTO sa buong bansa.

Ipinaliwanag ni Asec Mendoza na ang layunin ng programa ay palakasin ang kaalaman at kakayahan ng mga enforcer ng LTO sa pagpapatupad ng Republic Act No. 4136 (Land Transportation and Traffic Code) at iba pang kaugnay na batas at regulasyon sa transportasyon, partikular ang R.A. No. 8750 (Seat Belts Use Act of 1999) at R.A. No. 11229 (Child Safety in Motor Vehicles Act).

“Kabilang din sa retooling training program ang mga alituntunin at pamamaraan sa pag-inspeksyon ng mga sasakyan, pati na rin ang tamang protocol sa pagsasagawa ng law enforcement operations,” ani Asec Mendoza.

“Sa pamamagitan ng pagpapalawak ng legal na kaalaman at pagpapahusay ng kakayahan ng aming mga tauhan sa pagpapatupad ng batas, masisiguro namin ang mas epektibo at maayos na pagpapatupad ng mga regulasyon sa transportasyon, mapapalakas ang kaligtasan sa kalsada, at mapapatibay ang tiwala ng publiko sa propesyonalismo at integridad ng aming mga enforcer sa buong bansa,” dagdag pa niya.

Iniutos ni Asec Mendoza ang pagsasagawa ng refresher training program matapos mag-viral ang isang insidente sa Bohol na kinasasangkutan ng isang motorcycle rider at ilang enforcer ng LTO.

Kasunod nito, iniutos ni Secretary Dizon ang agarang pagtatanggal sa limang personnel ng LTO na sangkot sa insidente at nagpahayag ng suporta sa utos ni Asec Mendoza na magsagawa rin ng moral at spiritual training program para sa lahat ng tauhan ng ahensya.

“Ang pagsasagawa ng retooling training program na ito ay patunay na sensitibo ang inyong LTO sa mga rekomendasyon ng ating mga kababayan at sa utos ng ating DOTr Secretary na patuloy na pagbutihin ang serbisyo sa mga Pilipino,” ani Asec Mendoza. (PAUL JOHN REYES)