Mas marami sanang namatay na health workers kung hindi bumili ng medical supplies ang pamahalaan mula sa Pharmally- Sec. Roque

SINABI ng Malakanyang na mas marami sanang namatay na health workers sa gitna ng COVID-19 pandemic kung hindi bumili ang gobyerno ng medical supplies mula Pharmally Pharmaceutical Corporation.

Ang pahayag na ito ni Presidential spokesperson Harry Roque ay bilang pagdepensa sa naging desisyon ng pamahalaan na bumili ng medical supplies mula Pharmally, ilang araw matapos na aminin ni Krizle Mago ng Pharmally sa isinagawang Senate committee hearing na pinalitan nila ang expiry dates ng face shields na binili ng pamahalaan para sa mga health workers.

“Kung hindi natin ‘yan binili, mas marami sanang health workers na ang nasawi dahil sa COVID-19,” ayon kay Sec. Roque.

“Even one life saved for billions we spent was well worth it because the Filipino is worth spending for,” dagdag na pahayag ni Sec. Roque.

Sinabi pa ni Sec. Roque na ang Department of Health ay nagbigay ng clearance na ang face shields ay alinsunod sa World Health Organization standards.

“Kung totoo po ‘yun (Mago’s claims), dapat panagutin. Maliit lang naman ang halaga ng face shield,” ayon kay Sec. Roque.

“What is most important here is kahit kelan pa minanufacture, lahat po ‘yan nagamit ng health workers at naging dahilan para maisalba ang buhay ng medical frontliners,” dagdag na pahayag nito.

Bago pa nagsagawa ng imbestigasyon ang Senado ukol sa pagbili ng pandemic supplies mula Pharmally, ang local manufacturers ay umapela sa pamahalaan na bumili ng kanilang produkto lalo pa’t ang pamahalaan naman ang nagsabi na gawing makabuluhan ang kanilang resources para sa COVID-19 response.

Pinanindigan naman ni Sec. Roque na ang Senate probe ay tungkol sa “grandstanding.”

“This is in aid of election,” dagdag na pahayag ni Sec. Roque.

Samantala, ang Senate blue ribbon committee ay naghahanap ng di umano’y overpriced pandemic items na binili ng pamahalaan noong nakaraang taon. (Daris Jose)