MATANDANG BINATA KULONG SA PANGMOMOLESTIYA SA 4 NA DALAGITA

REHAS na bakal ang kinasadlakan ng 54-anyos na binata matapos ireklamo ng pangmomolestiya sa apat na dalagita niyang kapitbahay sa Malabon city, kamakalawa ng hapon.

Lango pa sa alak si Danilo Garcia, walang trabaho at residente ng 37 Don Basilio Bautista Blvd. Brgy. Hulong Duhat nang dakpin ng mga tauhan ni P/Maj. Patrick Alvarado, hepe ng Malabon Police Sub-Station 7 matapos ireklamo ng mga magulang ng apat na dalagitang biktima.

Sa tinanggap na ulat ni Malabon police chief P/Col. Albert Barot, nagkukuwentuhan ang magkakaibigang dalagita sa Bantayan Street, Brgy Hulong Duhat dakong alas-5 ng hapon nang dumaan si Garcia na nasa impluwensiya ng alak at hinalikan sa pisngi ang 15-anyos at 16-anyos na dalagitang biktima.

Binalingan din ng suspek ang 14-anyos at 15-anyos na na kasamahan ng dalawang naunang biktima at hinalikan naman ang mga ito sa labi.

Sa takot ng mga dalagita, nagtatakbo kaagad ang mga ito palayo sa suspek at isinumbong sa kani-kanilang mga magulang ang ginawang kalaswaan sa kanila ng suspek.

Humingi naman ng tulong kay P/EMSgt. Jerry Bautista ng Malabon Police Sub-Station 7 ang mga magulang ng dalagita na nagresulta sa pagkakadakip sa suspek na nahaharap ngayon sa kasong Acts of Lasciviousness. (Richard Mesa)