Mga Dengue fast lane, bukas na sa lahat ng pampublikong ospital sa Bulacan

LUNGSOD NG MALOLOS – Sa layuning makapagbigay ng agaran at episyenteng pangangalaga sa mga pasyenteng hinihinalang may Dengue fever, naglabas ang Pamahalaang Panlalawigan ng Bulacan sa pamamagitan ng Provincial Health Office-Public Health ng pabatid hinggil sa pagtatalaga ng Dengue fast lanes sa lahat ng pampublikong ospital sa lalawigan.

Mahalaga ang mga fast lane na ito para sa maagap na pagtuklas ng sintomas, mabilis na paglunas, at aktibong pamamahala ng mga kaso ng Dengue, lalo na sa panahon ng outbreak.

Nakasaad sa pabatid na kinakailangang magtalaga ang mga pampublikong ospital ng mga special specific zones na nakalaan para sa pagsusuri at pamamahala ng mga pasyenteng hinihinalang may Dengue. Dapat din tiyakin ng mga ospital na mayroon silang sapat na suplay ng mga kinakailangang kagamitang medikal at gamot kabilang ang intravenous fluids, diagnostic tools, at mga mahahalagang medikasyon upang episyenteng matugunan ang mga pasyente na may Dengue.

Gayundin, kinakailangang makipag-ugnayan ang mga ospital sa local health authorities upang maipaalam sa  publiko ang pagkakaroon ng Dengue fast lanes na humihikayat ng maagang pagkonsulta at pagsuri sa mga hinihinalang kaso.

Matatandaan na noong Enero 25, naglabas si Gob. Daniel R. Fernando ng memorandum sa lahat ng mga alkalde ng lungsod at bayan hinggil sa pagpapaigting ng mga hakbang sa pag-iwas upang mapigil ang posibleng pagtaas ng mga kaso ng Dengue matapos makapagtala ng 83% na pagtaas ngayong taon kumpara sa naitalang kaso (6,437) sa kaparehong panahong noong 2023.

Ipinag-uutos ng Memorandum DRF-01132025-035 sa lahat ng lokal na pamahalaan na magsagawa ng sabayan at malawakang paglilinis araw-araw tuwing alas-4:00 ng hapon; magsagawa ng regular na search and destroy operations; makahikayat ng maaga at maagap na konsultasyon sa mga health center o ospital kapag nakararanas ng anumang sintomas ng Dengue; panatilihin ang malinis at hindi baradong irrigation system; magsagawa ng malawakang information dissemination at community forums; regular na pag-inom ng tubig upang maiwasan ang dehydration; at para sa lahat ng Barangay Health Workers upang magsagawa ng active surveillance sa kani-kanilang lokalidad at agarang maituloy ang mga residente na may dalawang araw na lagnat sa pinakamalapit na health center at ospital para mabigyan ng karampatang lunas.

Binigyang diin ni Fernando na libre ang pagbibigay ng lunas sa Dengue sa mga pampublikong ospital sa lalawigan at hinikayat rin niya ang mga Bulakenyo na patuloy na mag-donate ng dugo upang makatulong sa pagsagip ng buhay.

“Kung may nararamdaman na po kayong sintomas ng Dengue, huwag na pong mag-atubili na magpatingin sa health center o sa ating mga pampublikong ospital, libre naman po ito. Mahalaga po ang early detection, mas maagang ma-detect kung may Dengue kayo, mas mabilis na malalapatan kayo ng angkop na lunas. Sa sama-sama nating pagkilos ay maililigtas sa sakit na Dengue ang buhay ng bawat Bulakenyo,” anang gobernador.

Aniya, may nakalaang spraying chemicals sa mga lokal na pamahalaan habang nagsasagawa ng fogging at spraying sa mga lugar na may clustering na kaso.