Mga nairehistrong sim cards sa bansa, umabot na sa mahigit 22-M – NTC

MAHIGIT  22.2 million SIM cards ang nairehistro na, tatlong linggo makaraang simulan ang mandatory registration period, ayon sa National Telecommunications Commission (NTC).

Sinabi ni NTC Officer-in-Charge Commissioner Ella Blanca Lopez, na umabot na sa 22,298,090 ang SIM card registrants, as of Enero 18, o katumbas ng 13.20 percent ng kabuuang 168 million active SIM subscribers sa bansa.

Sa 22.2 million, ang Smart Communications Inc. ang may pinakamalaking bilang ng registrants na mahigit 11.1 million, sumunod ang Globe Telecommunications na may mahigit 9.3 million at DITO Telecommunity na may mahigit 1.8 million.

Samantala, sa pulong ng Inter-Agency Ad Hoc Comittee For Facilitation of SIM registration in Remote areas, iprinisinta ng NTC sa member agencies at telcos ang listahan ng mga lugar na tinukoy ng kanilang sim registration act task force bilang remote.

Inihayag ni Lopez na kabuuang 45 remote areas ang tinukoy mula sa 15 rehiyon sa bansa.

Nagsimula ang mandatory SIM card registration noong Disyembre 27, 2022, alinsunod sa Republic Act No. 11934 o SIM Registration Act.

Ang deadline naman sa pagpaparehistro ng sim cards ay sa April 26, 2023. (BISHOP JESUS “JEMBA” M. BASCO)