Mga Pinoy sa HK, binabantayan na ng DOLE dahil sa ‘mandatory vaccination order’

Tiniyak ng Department of Labor and Employment (DOLE) na binabantayan na nito ang kasalukuyang sitwasyon sa Hong Kong kasunod nang naging desisyon ng gobyerno nito na gawing mandatory ang pagbabakuna laban sa coronavirus disease sa libo-libong banyagang manggagawa sa naturang rehiyon.

Ayon kay Director Rolly Francia, mino-monitor na raw ng DOLE ang pagpapatupad ng bagong patakaran na mandatory vaccination sa Hong Kong.

Batay aniya sa kung anong mangyayari sa nasabing kautusan ay gagawa umano ng hakbang si Labor Sec. Silvestre Bello III upang tugunan ang anumang magiging epekto nito sa mga overseas Filipino workers (OFWs) na nasa Hong Kong.

Subalit sinabi rin nito na posibleng magbigay ng opisyal na pahayag si Bello ngayong araw tungkol sa usapin sakaling may development sa mga pangyayari.

Kabi-kabilang batikos naman ang natanggap ng Hong Kong dahil sa di-umano’y diskriminasyon nito sa mga Pinoy domestic workers o household service workers sa mandatory vaccination rule ng rehiyon.

Base sa mga ulat na ang mga banyagang manggagawa sa Hong Kong ay kinakailangang magpaturok ng COVID-19 vaccine. Ang sinumang tatanggi rito ay hindi makakapag-renew ng working contract.

Para naman sa mga manggagawa na papasok pa lang sa Chinese-controlled territory, kailangan muna silang mabakunahan bago payagang makapasok.

Nananawagan naman ang karamihan na kasabay ng mandatory vaccination sa Homng Kong ay ang pagsasagwa rin ng mandators testing para sa mga domestic workers na karamihan ay mga Pilipino.

Hong Kong ang ika-apat na destinasyon ng mga OFWs, sinundan ito ng Saudi Arabia, United Arab Emirates, at Singapore.

Bago pa man ang pandemic, pumapalo ng 16,000 kada taon ang mga OFWs na ipinapadala sa Hongkong, katumbas ito ng 13,000 indibidwal sa loob ng isang buwan, ngunit bumagsak ito ng 80 percent o 32,000 OFWs noong 2020 dahil sa COVID-19 pandemic. (Gene Adsuara)