PBBM, isang ‘unstoppable leader’- DAR

ITINUTURING ni Agrarian Reform Secretary Conrado Estrella na isang ‘unstoppable leader’ si Pangulong Ferdinand Marcos Jr.

Kapansin-pansin naman kasi ayon sa Kalihim na ayaw magpaawat at walang nakapipigil kay Pangulong Marcos mula sa paghahatid ng ‘good services’ sa mga Filipino.

“Kahit na po kaarawan niya, kahit birthday niya na kasama ho niya ang kanyang pamilya, hindi po [nagpapaawat]. Noong kaarawan po niya, nagpunta po kami ng Nueva Ecija, nagpunta po kami kung saan-saan, namimigay ng titulo sa ating mga kababayan, ,” ang sinabi ni Estrella patungkol sa Pangulo sa isang event sa Tarlac, araw ng Lunes.

Kasama ng Pangulo sa pamamahagi ng Certificates of Condonation with Release of Mortgage (COCROMs) sa Tarlac, binigyang-diin ni Estrella ang determinasyon ni Pangulong Marcos na harapin ang lahat ng hamon para mapagsilbihan ang mga mamamayan lalo na ang mga kapus-palad o mahihirap.

Kahit pa aniya may sakit ang Pangulo at kailangan na magpahinga ay wala talagang makapigil sa Pangulo sa pagbibigay-serbisyo sa mga mamamayan lalo na sa mga nangangailangan.

“At kahit po may sakit, akalain niyo ho ay nagkasakit. Kahit s’ya na ho ang may sakit… Dapat ang Presidente kung may sakit, doon na lang sa bahay, nagpapahinga. Ngunit kahit na bahing nang masama ang pakiramdam, tumuloy pa rin ho kami sa Palawan at sa Iloilo,” ang sinabi ni Estrella.

Naniniwala si Estrella na hindi apektado ang Pangulo na sitwasyon, umulan man o umaraw, araw man o gabi.

Inalala nito ang insidente kung saan pinayuhan ang Pangulo na huwag nang tumuloy sa pagbisita sa Agrarian Reform Beneficiaries (ARBs) sa Mindanao dahil sa masungit na panahon subalit tumuloy pa rin ito.

Samantala, namahagi naman si Pangulong Marcos ng 4,663 COCROMs sa 3,527 ARBs sa Paniqui, Tarlac.

Sa nasabing event, muling inulit ng Pangulo ang commitment ng kanyang administrasyon na tiyakin na ang mga ARBs sa Pilipinas ay abswelto na mula sa kanilang pagkakautang. (Daris Jose)