PDU30, inakusahan ang Senado na sangkot sa ‘fishing expedition’

MULING binatikos ni Pangulong Rodrigo Roa Duterte ang mga senador lalo na si Senate Blue Ribbon Committee chairman Richard Gordon, dahil sa halatadong pag-witch hunt para makakuha ng ganansiya sa politika.

Sa mga bagong bira ng Pangulo laban kay Gordon, inulit ng Chief Executive ang kanyang akusasyon laban kay Gordon na ginagamit ang kanyang posisyon para kanyang kapakinabangan sa politika.

“Sabihin mo kung ano ang kulang para malaman namin. Ngayon kung mayroon kang nakita, ilabas mo na para malaman namin kung ano ‘yan. And because you cannot find any overpricing, or it’s because a witch hunt, a fishing expedition, or a political circus. Na kunwari sa panahon na ito, ikaw ang graft buster. Ikaw ang naghahanap ng katiwalian sa gobyerno,” ayon sa Pangulo sa kanyang Talk to the People, araw ng Lunes.

“Is the ongoing inquiry truly in aid of legislation, or is it for political purposes? The simple fact is that the Blue Ribbon Committee has failed to produce anything to prove its accusation of corruption,” dagdag na pahayag ni Pangulong Duterte.

Matatandaang, nauna nang binanatan ni Duterte si Gordon sa gitna ng imbestigasyon ng senate blue ribbon committee sa mga diumano’y korapsyon na nangyayari sa kasalukuyang administrasyon.

Sa kanyang “Talk to the People” tinanong ni Duterte si Gordon kung bakit nga ba libre ang nakukuhang dugo ng Philippine Red Cross na pinamumunuan ng senador ngunit may bayad na ito pag kinailangan na ng mga tao.

Naniniwala ang Pangulo na may nangyayaring korapsyon sa Red Cross sa ilalim ng pamumuno ni Gordon.

“May I remind the good senator, that alam mo yung corruption mo dyan sa Red Cross, buhay ang nilalaro mo dyan. As a matter ang kapital mo nga, dugo. Hindi ka na nahiya dyan?

“Mahilig kayong magpa-bloodletting. Isang batalyon na pulis, isang batalyon na army. Tapos ang mga tao dyan kung kailangan, bumili. Ang mahirap dyan o mayaman, gusto ng dugo sa Red Cross, nagbabayad!

“Eh saan naman yung mga dugo na kinuha mo dyan sa mga sundalo pati pulis pati sibilyan? I’m just trying to reconcile… Magbayad ka maski mahirap ka.” ani Duterte.

Sinabi din ng Pangulo na kakausapin niya si ‘Dracula’ ang sikat na sikat na bampira para kunin ang dugo ng Senador.

Matagal ng kwestiyon ng mga tao ang paniningil ng Red Cross sa dugo.

Sinagot naman ito ng isa sa mga trabahador ng nasabing organisasyon at sinabi na ginagastusan ng Red Cross ang ilang test para masigurado na ligtas ang dugo na isasalin sa pasyente.

Magugunitang hiniling ng Pangulo sa Commission on Audit (COA) na imbestigahan ang Red Cross dahil sa diumano’y korapsyon na nangyayari sa organisasyon. (Daris Jose)