Pondo ng NTF-ELCAC para sa PNP nuong 2020, ‘di napunta sa anomalya – PNP chief

Tiniyak ng pamunuan ng Philippine National Police (PNP) na hindi napunta sa anomalya ang hindi masyadong nagastos na pondo ng National Task Force to End Local Communist Armed Fund para sa Pambansang Pulisya noong 2020.

Ito ang paglillinaw ni PNP Chief Police General Guillermo Eleazar matapos ang puna sa kanila ng Commission on Audit sa low disbursement ng budget para sa anti-communist insurgency projects.

Batay sa COA report, nasa P86.57 million lamang ang nagastos ng PNP sa kanilang anti-communist programs.

Ibig sabihin may balanse pa ang PNP na P482.1 million mula sa P722.9 Million na pondo na inilabas ng Department of Budget and Management (DBM) noong 2020.

Ayon kay Eleazar, dahil sa pandemya, na-i-release lamang ang pondong umaabot sa kabuuang P722.955 million sa PNP noong Oktubre 26, 2020 at hindi pa ito puwedeng gastusin lahat sa natitirang dalawang buwan ng 2020 dahil sa mahigpit na alituntunin ng batas sa paggastos ng pondo ng taumbayan.

Pagtitiyak ni Eleazar sa COA at publiko wala ni isang sentimo sa pondo ng PNP ang nawawala sa korapsyon dahil ito ay buwis ng taumbayan na dapat pangalagaan at hindi pag-interesan.

Siniguro din ng PNP na palalakasin pa ng PNP ang kanilang kampanya laban sa insurgency.

“Makakaasa ang ating mga kababayan na sa aking pamumuno, wala ni isang sentimo sa pondong ito ang mawawala sa korapsyon dahil ito ay buwis ng taumbayan na dapat pangalagaan at hindi pag-interesan,” pahayag ni Gen Eleazar. (Daris Jose)