SWS: Pamilyang Pinoy na nakaranas ng gutom, tumaas sa 20% noong Abril

BAHAGYANG tumaas sa 20% ang bilang ng mga pamilyang Pinoy na nakaranas ng involuntary hunger noong Abril, ayon sa Social Weather Station (SWS).

Ang survey ay isinagawa mula Abril 23-28, 2025 at ang resulta nito ay inilabas noong Sabado.

Inilarawan ng SWS ang involuntary hunger bilang pagkagutom na walang anumang kakainin­ ng minsan sa nakalipas na tatlong buwan.

Ang pinakahuling hunger rate ay bahagyang mas mataas kumpara sa naitalang 19.1% sa survey na isinagawa noong Abril 11-15, 2025.

Sa naturang 20% na hunger rate, 16.4% ang nakaranas ng “moderate hunger” o nakaranas ng gutom ng minsan o ilang beses, at 3.6% ang nakaranas ng “severe hunger” o madalas at palaging nakakaranas ng gutom, sa nakalipas na tatlong buwan.

Pinakamaraming nagutom sa Mindanao na nasa 26.3% ng mga pamilya.

Sinundan ito ng Metro Manila na nasa 20.3%, Visayas 19.7%, at ­Balance Luzon 17%.

Sa nasabi ring survey, lumitaw na nasa 50% ng pamilyang Pinoy ang ikinukonsiderang mahirap ang kanilang sarili habang nasa 8% ang nagsabing sila ay nasa borderline ng mahirap at hindi mahirap.

Nasa 42% ang nagsabi na sila ay hindi mahirap.

Noong Disyembre 2024, iniulat ng SWS na nasa 63% o 17.4 mil­yong pamilyang Pinoy ang ikinukonsidera ang kanilang sarili na mahirap, na pinakamataas na rate sa loob ng 21 taon.