2 drug suspects tiklo sa P.1M shabu sa Valenzuela

MAHIGIT P.1 milyong halaga ng shabu ang nasamsam sa dalawang drug suspects na naaresto ng pulisya sa isinagawang buy bust operation sa Valenzuela City, kamakalawa ng gabi.

Sa kanyang ulat kay Northern Police District (NPD) Director P/BGen. Rizalito Gapas, kinilala ni District Drugs Enforcement Unit (DDEU) chief P/Major Jeraldson Rivera ang naarestong mga suspek na si alyas Jojo, 47, at alyas Chris, 37, kapwa residente ng lungsod.

Ayon kay Major Rivera, bago ang pagkakaaresto sa mga suspek ay unang nakatanggap sila ng impormasyon hinggil sa umano’y illegal drug activities ni ‘Jojo’ kaya isinailalim nila ito sa validation.

Nang makumpirma na positibo ang report, bumuo ng team si Major Rivera sa pangunguna ni P/Capt. Regie Pobadora saka ikinasa ang buy bust operation na nagresulta sa pagkakaaresto kay ‘Jojo’ at ‘Chris’ dakong alas-10:40 ng gabi sa Pitacion St., Elysian Subdivision, Brgy. Marulas.

Nakumpiska sa mga suspek ang humigi’t kumulang 15 grams ng hinihinalang shabu na nagkakahalaga ng P102,000 at buy bust money na isang P1,000 bill at isang P1,000 boodle money.

Pinuri naman ni Gen. Gapas ang DDEU sa kanilang matagumpay na drug operation na nagresulta sa pagkakadakip sa mga suspek na kapwa mahaharap sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)