2 drug suspects, timbog ng DDEU sa buy bust sa Caloocan, P147K droga nasamsam

MAHIGIT P.1 milyong halaga ng ilegal na droga ang nasamsam ng mga operatiba ng District Drug Enforcement Unit ng Northern Police District (DDEU-NPD) sa dalawang drug suspects na naaresto sa buy bust operation sa Caloocan City.

Sa kanyang ulat kay NPD OIC Director P/Col. Josefino Ligan, kinilala ni DDEU chief P/Major Jeraldson Rivera ang naarestong mga suspek na sina alyas “Buknoy”, 24, at alyas “Budoy”, 18, kapwa residente ng lungsod.

Ayon kay Major Rivera, nakatanggap sila ng impormasyon hinggil sa umano’y pagtutulak ng ilegal na droga ni alyas Buknoy kaya bumuo siya ng team sa pangunguna ni P/Capt. Regie Pobadora saka ikinasa ang buy bust operation nang magawa ng isa sa kanyang mga tauhan na makipagtransaksyon sa suspek.

Nang tanggapin umano ng suspek ang P500 marked money mula sa isang pulis na nagpanggap na poseur buyer kapalit ng isang plastic sachet ng shabu ay agad siyang dinamba ng mga operatiba dakong alas-4:12 ng madaling araw sa Libis Espina, Brgy. 18, kasama ang kanyang kasabwat na si alyas Budoy.

Ani Capt. Pobadora, nakumpiska nila sa mga suspek ang humigi’t kumulang 20 grams ng hinihinalang shabu na nagkakahalaga ng P136,000, nasa 17 grams ng umano’y pinatuyong dahon ng marijuana na nagkakahalaga ng P2,040, anim na gramo ng pinaniniwalaang kush na nasa P9,000 ang halaga, cellphone at buy bust money.

Pinapurihan naman ni Col. Ligan si Major Rivera at kanyang mga tauhan sa kanilang matagumpay na drug operation na nagresulta sa pagkakaaresto sa mga suspek na kapwa mahaharap sa kasong paglabag sa RA 9165 o ang Comprehensive Dangerous Drug Act of 2002. (Richard Mesa)