2 ‘tulak’ tiklo sa P224K shabu sa Caloocan at Valenzuela

TIMBOG ang dalawang umano’y tulak ng illegal na droga, kabilang ang isang bebot matapos makuhanan ng mahigit P.2 milyong halaga ng shabu sa magkahiwalay na buy bust operation sa Caloocan at Valenzuela Cities.

Ayon kay Caloocan police chief P/Col. Paul Jady Doles, dakong alas-12:08 ng tanghali nang maaresto ng mga operatiba ng Station Drug Enforcement Unit (SDEU) sa pangunguna ni P/Lt. Restie Mables sa buy bust operation sa BMBA Compound, 3rd Avenue, Brgy 118, si alyas ‘Cecil’, 39.

Nakumpiska sa suspek ang himigi’t kumulang 11 grams ng hinihinalang shabu na may katumbas na halagang P74,800.00 at buy bust money na isang P500 bill, kasama ang anim pirasong P1,000 boodle money.

Sa Valenzuela, natimbog naman ng mga operatiba ng SDEU ng Valenzuela police sa ilalim ng pangangasiwa ni P/Lt. Joselito Suniega sa buy bust operation sa Bagumbong Road, Brgy. Bignay dakong alas-5:15 ng umaga si alyas ‘Regor’.

Sa report Lt. Suniega kay Valenzuela police chief Col. Nixon Cayaban, nakuha sa suspek ang nasa 22 grams ng hinihinalang shabu na nagkakahalaga ng P149,600, buy bust money na isang P500 bill, kasama ang walong pirasong P1,000 boodle money, P300 recovered money at cellphone.

Pinuri naman ni NPD Director P/BGen. Rizalito Gapas ang C aloocan at Valenzuela police sa kanilang matagumppay na operasyon kontra droga na nagresulta sa pagkakadakip sa mga suspek na kapwa mahaharap sa kasong paglabag sa Section 5 at 11 Article II of RA 9165 o ang Comprehensive Dangerous Drug Act of 2002. (Richard Mesa)