39 NSAs sigurado ang pondo para sa SEAG

Maghihigpit ng sinturon ang Philippine Sports Commission (PSC) sa paglalabas ng pondo para sa mga National Sports Associations (NSAs).

Sa ngayon, tanging 39 NSAs lamang ang i­naprubahan ng PSC na makatatanggap ng pondo mula sa government sports agency.

Ito ay ang mga NSAs na sasabak sa 31st Southeast Asian Games na idaraos sa Nobyembre 21 hanggang Disyembre 2 sa Hanoi Vietnam.

Nangunguna sa listahan ang athletics, arnis at dance sport na humakot ng gintong medalya sa nakalipas na SEA Games na ginanap sa Pilipinas.

Bagama’t hindi kasama ang arnis sa Vietnam SEA Games, kasama ito sa popondohan ng PSC dahil ito ang national sport ng bansa.

Pasok din ang boxing, gymnastics at weightlifting na pare-parehong may pambato sa Tokyo Olympics na idaraos sa Hulyo sa Japan.

Ipaparada ng boxing sina Eumir Felix Marcial at Irish Magno habang aariba rin si world champion Carlos Edriel Yulo ng gymnastics.

Isang torneo na lamang ang kailangang puntahan ni Rio Olympics silver meda­list Hidilyn Diaz – ang Asian Weightlifting Championship sa Uzbekistan – para makapasok sa Tokyo Olympics.

Kwalipikado na rin si SEA Games record-holder EJ Obiena na mula sa athletics.

Maliban sa mga na­banggit na sports, nasa listahan din ng PSC ang  aquatics, taekwondo, fen­cing, wushu, chess, canoe-kayak, basketball, volleyball, football, handball, triathlon, esports, judo, pencak silat, shooting, karate, rowing, wrestling, kickboxing, muay thai, bodybuilding, billiards and snooker, tennis, golf, archery, badminton, bow­ling, jiu-jitsu, sepak takraw, vovinam, fin swimming, cycling at table tennis.

Sariling gastos ang magiging sitwasyon ng mga hindi nakasama sa 39.

Ngunit hindi naman dapat mawalan ng pag-asa ang mga NSAs na hindi nabanggit dahil posible silang madagdag sa listahan sa oras na muling magsagawa ng review ang PSC.