Pamilya ng dating player na si Pascual nanawagan

NAGPAPASAKLOLO na naman ang pamilya at ilang nagmamalasakit na kaibigan ni dating Philippine Basketball Association (PBA) player Ronald Pascual dahil sa pagbalik sa masamang gawain.

Pinarating ni Jovy Evaristo ng Mr. CabalenHoops, sa kanyang Facebook account nito lang makalawa ang sentimyento para sa dalawang beses na manlalarong nagkampeon sa unang Asia play-for-pay hoop.

“Kung mapapanood ni idol Ronald ito, masasaktan siya, pero lahat ng ginagawa namin ay para sa kanya rin bilang kaibigan at bilang kapatid,” litanya niya.

HInirit pa ni Evaristo na humihingi uli si Pascual ng pera sa ilang nilang tropa upang gamitin lamang para sa kanyang hindi mabuting bisyo.

“Ang binibigay na tulong ang nagiging gasolina niya para umapoy uli ang masamang ginagawa niya na dati,” pagbubunyag niya.

Kinumpirma naman ang bagay ng utol ni Ronald na si Ronnel Pascual.

“Sa ngayon, hindi makakatulong ang pinansyal dahil alam natin na nasa dark side siya,” wika ng kapatid. “Ang gustong mangyari ng pamilya ni Ronald, makauwi na lang siya sa kanilang tahanan at magbagong buhay para sa kabutihan na rin ng pamilya.

“Hindi pera ang kailangan ni Ronald kundi pananampalataya sa Diyos, ang matinding pagbabalik-loob sa Panginoon para maiwasan niya ang ganoong isyu, ang ganoong mga gawain,” panapos na sambit nang mas batang Pascual.

Sa kalakasan pa, naglaro sa liga si Pascual sa mga koponan ng San Miguel Beer, Star Hotshots (Magnolia na ngayon), GlobalPort (NorthPort na sa kasalukuyan), Blackwater at Alaska Milk.

Umayos ka Ronald!