PDu30, binalaan ang mga byahero laban sa pagpi-prisinta ng pekeng negative COVID-19 test results

BINALAAN ni Pangulong Rodrigo Roa Duterte ang mga travelers o byahero laban sa pagpapakita o pagpi-prisinta ng “pekeng” negative COVID-19 test results lalo na sa mga tourist spots ng bansa.

Sa kanyang Talk to the People, Lunes ng gabi, inatasan ni Pangulong Duterte ang Philippine National Police (PNP), Department of Tourism at lahat ng local government units na arestuhin ang mga gagawa ng pagpapakita ng fake negatve covid 19 results at magpatupad nang mahigpit na pagsunod sa protocols sa local tourism.

“‘Wag ho ninyong gawin ‘yan at makokompromiso kayo. Pati ‘yung gastos ninyo. Kindly check twice over where you have genuine certificate,” ayon kay Pangulong Duterte.

“Arrest those presenting fake tests and enforce strict compliance of protocols of local tourist,” dagdag na pahayag ng Chief Executive.

Sinabihan din ng Punong Ehekutibo ang mga concerned government agencies na huwag matakot na patawan ng kaparusahan ang mga indibiduwal na mahuhuling namemeke ng COVID-19 tests.

Nauna rito, sinabi ng PNP na ang mga mahuhuling namemeke ng COVID-19 tests ay mahaharap sa falsification of public documents at paglabag sa Mandatory Reporting of Notifiable Diseases and Health Events of Public Health Concern Act.

Pagmumultahin ng P50,000 at pagkakakulong ng “at least a month but not more than six months” ang mga mahuhuling violators sa pamemeke ng COVId-19 test results.

Nakasaad kasi sa batas na “tampering of records relating to notifiable diseases or health events of public health concern, which includes official medical test results or medical certificates, or such other documents and records issued by public health authorities is punishable by law.” (Daris Jose)