Sec. Roque, nagpaalam na bilang tagapagsalita ni PDu30 at ng IATF

NAGPAALAM na si Presidential Spokesperson Harry Roque sa publiko na iiwan nito ang kanyang posisyon para harapin ang hamon sa kanyang pagtakbo sa pagka-senador.

Sa kanyang virtual press briefing, sinabi ni Sec. Roque na ito na ang huling araw na tatayo siya bilang tagapagsalita ng Pangulo at tagapagsalita ng Inter-Agency Task Force (IATF).

Hindi naman binanggit ni Sec. Roque kung sino ang papalit sa kanya bilang tagapagsalita ni Pangulong Duterte.

“Nagpaalam na po ako kay Presidente Rodrigo Roa Duterte at kay Mayor Inday Sara Duterte para sa panibagong hamon na aking haharapin mula sa inyong pagiging Spox ay nais ko pong maging action man sa Senado,” ayon kay Sec. Roque.

Bago pa magtapos ang kanyang press briefing ay pinasalamatan ni Sec. Roque ang lahat ng kanyang nakasama sa Office of the Presidential Spokesperson.

“Sa OPS hanggang sa mga kasama natin sa Malacanang Press Corps, sa RTVM, sa PTV, Usec. Rocky.. iloveyou, Radyo Pilipinas, Philippine Information Agency, Malacanang Records Office, transcribers, photographers ng NIB, Presidential Photographers Division, PSG partikular sa S3 at sa buong Pilipinas na tumangkilik sa atin,” lahad ni Sec. ROQUE.

Sa kabilang dako, tiniyak ni Sec. Roque na walang kinalaman ang kanyang lagtakbo sa pagka-senador sa naging pagkatalo niya at mabigo na makasungkit ng posisyon sa International Law Commission (ILC).

“Wala naman po noh? pero siguro po sabihin na lang natin na dahil nga po ako’y nagkaroon ng isang salita na tatakbo lang ako kung tatakbo po si Mayor Sara eh tumakbo na po si Mayor Sara. Kinakailangan, panindigan din natin ang nasabi nating salita,” ayon kay Sec. Roque.

“Pero ulitin ko po noh? ang pagtakbo po natin para itaguyod muli ang ating mga buhay sa pamamagitan po ng pag-iingat buhay,” dagdag na pahayag ni Sec. Roque. (Daris Jose)