DBM, inilunsad ang ‘Angat local PH’ para sa devolution info

INILUNSAD ng Department of Budget and Management (DBM), kasama ang Department of the Interior and Local Government (DILG), at Presidential Communications Operations Office (PCOO), ang “Angat Lokal PH’ Facebook page para ikasa at masimulan ang “awareness at information campaign on devolution” ng pamahalaan.

Ang ‘Angat Lokal PH” FB page ay official social media platform na naglalayong ipakalat ang updates at impormasyon na may kinakaman sa Mandanas-Garcia Supreme Court Ruling of 2019, at implementasyon ng Executive Order No. 138 na nilagdaan ni Pangulong Rodrigo Roa Duterte noong Hunyo 1, 2021, hinggil sa Full Devolution, o paglilipat ng ilang tungkulin sa pagpapaabot ng mga pangunahing serbisyo mula sa mga ahensiya ng national government tungo sa local government units (LGUs).

Tampok sa ‘Angat Lokal PH’ Facebook page ang mga makabuluhang balita,, visuals, infographics, videos, featurettes, at press releases “on topics parallel to the impending devolution of power and services to LGUs.”

Makikita naman ng LGUs ang pagtaas sa bahagi ng kanilang national taxes sa simula ng 2022, na nakasaad sa EO No. 138, at alinsunod sa Mandanas ruling.

“The increase in fiscal allocation would enable LGUs to better serve their constituents by providing basic services and implementing devolved programs and projects,” ayon sa ulat.

“Dahil sa full devolution, ‘Aangat ang Lakas ng Lokal’ sa tulong ng ‘Dagdag na Pondo’ na magdudulot ng ‘Angat Serbisyo’ para sa mga mamamayan’,” ayon kay DILG Secretary Eduardo Año.

Ang ‘Angat Lokal PH’ page ay co-administered ng mga miyembro ng Devolution Sub-Committee on Communication Strategy.

At para sa karagdagang kaalaman at impormasyon ukol sa devolution, mangyaring bisitahin lamang ang Angat Lokal PH, at https://facebook.com/AngatLokalPH. (Daris Jose)