PDu30, inirekomenda sa susunod na Pangulo na agad na simulan ang pagpapatawag ng constitutional convention

INIREKOMENDA ni Pangulong Rodrigo Roa Duterte sa idedeklarang ika-labing pitong Pangulo ng Pilipinas na atupagin ang constitutional convention.

Sa kanyang Talk to the People, araw ng Huwebes ay sinabi ng Chief Executive na kailangan na talagang gawin ang nasabing hakbang at nakikita niyang may demand nang palitan ang konstitusyon.

Sinabi nito na masyadong magastos kung magpapatawag ng constitutional convention subalit kailangan aniyang gawin na ito at dapat ng umpisahan agad ng papasok na Administrasyon.

Aniya, kung gagawin kasi ang inisyatibo ng papatapos na ang termino ng papasok na Administrasyon , baka maakusahan pa aniya ito na ginagawa lang ang pagbabago sa konstitusyon dahil sa term extension gaya ng ibinato sa kanyang akusasyon.

Kasama rin sa iminumungkahi ng Punong Ehekutibo sa kanyang successor ang pagbuwag na sa party list system gayung nagagamit lang aniya ito laban mismo sa gobyerno partikular ng mga makakaliwa na ang layunin ay para sila ang pumalit sa pamahalaan. (Daris Jose)