Nagbawas at nagdagdag para maging relevant at fresh: MICHAEL V., kinausap ang mga natsugi sa ‘Bubble Gang’ para ‘di sumama ang loob

SA pag-launch ng bagong Bubble Gang sa May 27, hindi na makakasama sa latest reformat ng show sina Mikoy Morales, Denise Barbacena, Liezel Lopez, Arra San Agustin, Lovely Abella, Ashley Rivera, Diego Llorico, Myka Flores at ang isa sa pioneer cast member na si Antonio Aquitania.

Ayon kay Michael V., ginawa raw nila ang magbawas at magpasok ng bagong cast members para mapanatili na relevant at fresh ang dating ng Bubble Gang na 27 years nang umeere sa GMA-7.

“I think, yung pagpapalit ng cast, paglalagay ng mga bagong segments, ito yung much-needed improvement sa show. Hindi kasi puwedeng maging stagnant yung ‘Bubble Gang’, it has to grow and it has to expand and I think this is the best way na gawin yun.

“Yung platform, kailangan nating intindihin, eh. Hindi puwedeng TV show na lang tayo. Ang dami nang platforms sa social media so I think, since trying to stay relevant yung show, siguro pati yung platform na pinaglalabasan niya, dapat maging relevant din.

“Hindi lang TV yung ini-inculcate natin ngayon kung hindi social media rin and at the same time, pabalik din, yung mga nasa social media, pwede natin ilagay sa TV show so maganda yung working relationship ng TV show at ng audience.”

Kinausap naman daw ni Bitoy ang mga natsugi sa Bubble Gang, “Ako, I felt the need to explain to them somehow, give them an insight kung bakit siguro nagkaroon ng ganoong dahilan. Unang-una para hindi talaga sumama yung loob nila, and at the same time, para ma-inspire sila na hindi naman ito yung pagtatapos talaga.

“Kasi this could probably be the beginning for some of them na simulan uli yung journey pabalik sa show. Kasi lagi namang bukas yung Bubble Gang for talents na kakailanganin namin and since naging part na rin sila, I’m pretty sure they’ll find their way back.”

Ang mga naiwan naman ay sina Chariz Solomon, Betong Sumaya, Sef Cadayona, Valeen Montenegro, Archie Alemania, Analyn Barro, Faye Lorenzo, Kokoy de Santos at Paolo Contis. Dinagdag naman na bagong cast sina Tuesday Vargas, Faith Da Silva, Dasuri Choi at Kim de Leon.

***

NAG-CELEBRATE ng kanilang unang taon bilang magkasintahan ang aktor na si Jerome Ponce at vlogger na si Sachzna Laparan.

Base sa kanilang post sa social media, ipinaalam ng dalawa ang tungkol sa kanilang anniversary.

Samantala, nag-share rin si Laparan ng mga retrato nila ni Ponce sa kanyang Instagram page.

“Mahal.. #1st,” ani Laparan sa caption ng kanyang post.

Noong nakaraang September, inamin ni Ponce na masaya siya sa kanyang lovelife.

“Happy, inspired, at napu-push ako lalo to make myself a better person, more knowledge, at mas appreciative sa buhay,” sey ni Ponce.

Ayon pa kay Ponce, masaya siya na makapagbigay din ng inspirasyon sa ibang tao sa pamamagitan ng vlogs kasama ang kanyang bagong inspirasyon.

June 2021 nang lumabas ang balitang nag-uugnay kina Ponce at Laparan nang batiin ng huli ang aktor para sa kaarawan nito.

Sa kanyang maiksing pagbati, tinawag pa ng vlogger ang aktor na “my soulmate.”

***

NATUPAD ni Billy Crawford na mapakilala nila ni Coleen Garcia ang kanilang anak na si Amari sa lolo nito na si Jack Crawford.

Post ni Crawford: “My wife made this happen! I’m so thankful for you @coleen for making my dreams come true. I never thought my father would even meet his grandson. And by God’s grace you have made all of this possible. Thank you so much my love. To the strongest, sexiest and most loving wife ever! Best 40th birthday ever.”

Sinilang si Amari noong September 2020 during the COVID-19 lockdown.

Nasabi na noon ni Crawford na wish ng kanyang ama na makita ang apo nito.

“Growing up kasi close family talaga kami. To see my dad, ang pangarap niya kapag kausap ko sila, ang sinasabi niya, ‘Son, I’m just holding on para makilala ko lang ‘yung anak niyo.’ Matanda na ang daddy ko and maraming complications. Pero marami akong matutunan at marami akong maituturo sa aming anak ni Coleen dahil sa ama ko. And I owe a lot to my dad.”

(RUEL J. MENDOZA)