Balik-tambalan, ‘gift’ nila sa mga fans at supporters: MAJA, inaming si RK lang ang naisip na maging partner sa ‘Oh My Korona’

NGAYONG Sabado, Agosto 6 mapapanood na isang kakaibang sitcom na magpapakita ng mga kuwelang eksena sa buhay ng mga showbiz hopefuls na nakatira sa ilalim ng iisang bubong.

Inihahandog ito ng Cignal Entertainment at Crown Artist Management, ang Oh My Korona na pinagbibidahan ng versatile actress at Majestic Superstar ng TV5 na si Maja Salvador, kasama ang Philippine Sitcom Legend na si Joey Marquez, siguradong pasasayahin ang weekend TV experience ng buong pamilya.

Sa newest weekly sitcom ng TV5, muling makakasama ni Maja si RK Bagatsing na gumawa ng marka sa pagganap nila sa drama series ng Wildflower.

Sa naganap na digital mediacon, sinabi ng aktres na parang ‘gift’ na nila ito ni RK sa patuloy na nagmamahal sa kanilang tambalan.

“Sa Wildflower kasi, sobrang intense bawat eksenang ginagawa namin ni RK. And hindi namin maitanggi na may chemistry at nagkaroon din ng maraming supporters ang Ivy Aguas and Mr. Mayor Arnaldo,” sabi ni Maja.

“Kaya naman nung naghahanap kami kung sino ang magiging partner ni Lablab dito sa sitcom, isang name ang naisip namin.

“Because yun nga, sa rami ng nagmamahal sa amin ni RK, na dun sa Wildflower kasi, hindi kami nag-end up together. Tapos, masalimuot ang mga sakit ng mga nagawa naming eksena dun.”

Dagdag pa niya, “So, gift namin ito sa aming mga fans at supporters na until now, for how many years, matagal nang wala ang Wildflower but nandun pa rin yung umaasa sila na, yun nga, one day, magkatrabaho kami ni RK.

“And eto na yun! Mas light yung ginagawa, super light ng mga ginagawa namin. Kung paano kami ni RK dun sa Wildflower pag walang camera, kung gaano kami kabungisngis na dalawa, kung gaano kami maraming naiisip na kalolokan.

“Naia-apply namin ngayon dito sa sitcom, kaya ibang side naman namin ni RK ‘yung mapapanood nila.”

Gagampanan nga ni Maja ang karakter ni Lablab, isang hotel manager na nawalan ng trabaho pero naging tagapagmana ng boarding house mula sa kanyang late beauty queen-actress mother kaya siya ay magiging landlady ng mga tenants na mga showbiz wannabes.

Si Joey naman ay gaganap bilang Louie, isang talent agency owner na gustong gawing prime talent niya si Lablab. Kasabay nito ay ang pagma-manage din ni Louie sa mga showbiz aspirants na tenants sa boarding house ni Lablab.

Ang Oh My Korona rin ang unang line production venture ng Crown Artist Management, ang talent management company ni Maja kasama ang kanyang fiancé na si Rambo Nuñez.

Si Ricky Victoria ang director ng sitcom at kasama nga sa cast si RK bilang Tim, at sina Kakai Bautista bilang Marga, Pooh bilang Gerry, Thou Reyes bilang Kobe, Christine Samson bilang Layla, Jessie Salvador bilang CJ, Jai Agpangan bilang Betchay, Guel Espina bilang JM at Queenay Mercado bilang Emy.

Simula ngayong Agosto, makisaya sa Oh My Korona tuwing Sabado, 7:30 pm sa TV5.

(ROHN ROMULO)