Avaricio kapit-tuko pa rin sa tuktok ng ICTSI Pradera

NAKIPAGSABAYAN si Chanelle Avaricio sa malakas na bugso ng hangin sa Pradera Verde Golf and Country Clubsa Lubao, Pampanga Miyerkoles, sinalpak ang 74 na nagtakda sa bukas pa ring labanan para magrereyna sa ICTSI Pradera Verde Championship women’s division.

Pero kapit pa rin sa tuktok ang 9th Ladies Philippine Golf Tour 2022 three-leg winner Miyerkoles kahit bumagsak ng pitong palo ang mainit na simulang 67 na nagpatunay sa pambihirang layout para sa mga kalahok maski tatlo ang bumasag ng par sa 54-hole, P1.25M championship.

Bumalikwas si Harmie Nicole Constantino sa disgrasya sa No. 4 sa mga birdie sa pang- 6 at 12 butas para sa pangalawang sunod na 71 at 142 at pagsegunda, habang nagsalpak ng apat na birdie si Florence Bisera laban sa dalawang bogey upang mag-isa rin tersera sa 143 tapos ng 36-hole play.

Nagbuslo rin si Pamela Floro ng 71 pa-145, para sa girian ng apat na manlalaro sa unang premyong P168,750 ng event na nagsisilbing 10th at penultimate leg ng LPGT at inoorganisa ng Pilipinas Golf Tournaments, Inc.

“I struggled on the greens with my club selection. I think nahirapan ako sa hangin at yun ang adjustment,” sey ni Avaricio, na binawi ang tatlong bogey sa unang anim na butas sa kambal na birdie hanggang pang-10 na nagpanatili sa kanya sa unahan laban sa mga karibal na dinaig niya ng anim na palo rito noong Hunyo.

“I really wasn’t hitting it close to the pin and I didn’t really give myself chance (sa mga birdie),” hirit ng Hallow Ridge at Caliraya Springs leg champion na ginagamit ang torneo sa paghahanda para sa Ladies Professional Golf Association Qualifying-School Stage II sa Florida sa Nobyembre. (REC)