Grateful sa ka-loveteam at sa ‘Eat Bulaga’: ALDEN, ‘di itinanggi na na-in love siya dati kay MAINE

SIGURADONG nagdiwang ang AlDub fans nina Alden Richards at Maine Mendoza sa sagot ni Asia’s Multimedia Star sa episode ng “Fast Talk with Boy Abunda” last October 9. 

Tinanong ni Boy Abunda si Alden kung na-in love ba siya kay Maine noong nabuo ang kanilang love team na “AlDub” sa “Eat Bulaga?”

“Yes, hypocrite po ako kung hindi,” sagot ni Alden.

“Ayoko pong sabihing alam niya but I did confess.  I’m very grateful to Maine and ‘Eat Bulaga’ for opening a door of opportunities for me. Ang daming dumating sa buhay ko because of it (AlDub), and I’m very grateful to Maine.”

Tungkol naman sa pagkabuwag ng AlDub, parang “break-up” na rin daw ito sa kanya pero nilinaw naman niya agad na hindi lahat ng break-up ay masama at masakit.

Kailangan daw lamang talaga ni Maine ng growth at mag-move forward ito noon.

Meanwhile, ilang araw na lamang ang hinihintay ng mga fans nina Alden at Julia Montes dahil ang opening day ng “Five Breakups and a Romance” ay sa October 18, pero may premiere night muna sila sa Tuesday, October 17.

The movie was written and directed by Irene Villamor, produced by GMA Pictures, Cornerstone  Studio and Myriad Productions.

                                                            ***

PUMAYAG pala ang new Triple A actress na si Carla Abellana na mag-guest sa “BlackRider,” ni Action-Drama Prince Ruru Madrid for GMA Network.  Gaganap si Carla bilang si Becky, isang teacher na maho-hostage ng isang grupo ng sindikato kasama ang kanyang tatlong students.

Feeling blessed ang aktres nang i-offer sa kanya ang said character dahil bukod sa naiiba ang role na ibinigay sa kanya ay makakatrabaho pa niya ang ilang veteran at award-winning stars.

“Maraming pagdadaanan yung role ko bilang teacher,” kuwento ni Carla sa “24 Oras Integrated News.”

Gagawin niya yung best niya na protektahan ang tatlo niyang estudyante. Kaya sasabak siya sa ilang action scenes dahil bilang hostage, makatitikim siya ng sampal, suntok, tadyak at iba pang pisikal na eksena kaya naman nakaranas siya ng mga minor injuries.

“Kaya nga lalo akong bumilib sa mga artistang nag-aaksyon, kabilang nga ang cast members ng Black Rider.”

Inamin din ni Carla na kahit guest role ang ginawa niya ay may ganitong occupational hazards din siyang nakuha kaya saludo raw siya sa mga regular cast ng serye, dahil hindi biro ang mga ginagawa nila.  Nakita raw niya kung gaano sila kaseryoso sa kanilang trabaho.

Samantala, malapit na rin ang world premiere sa November ng bagong GMA Afternoon Prime drama series na “Stolen Life” ni Carla na makakasama niya muli si Gabby Concepcion at kasama rin nila si Beauty Gonzalez.

                                                         ***

NAG-CELEBRATE na rin pala sina Barbie Forteza at David Licauco ng kanilang first year anniversary as a love team, nang gawin nila ang “Maria Clara at Ibarra” sa GMA Network.

Patuloy namang tumataas ang rating ng bago nilang pinagtatambla na, ang “Maging Sino Ka Man” na napapanood gabi-gabi, after “24 Oras” sa GMA-7.

(NORA V. CALDERON)