Target na pamamahagi ng land titles para sa taong 2023, maaaring sumobra

MAAARING sumobra sa target na pigura ng pamahalaan ang ipamamahaging land titles para sa mga Agrarian Reform Beneficiaries (ARBs).

Sinabi ni Pangulong Ferdinand Marcos Jr., na ito ang “best christmas gift” ng pamahalaan sa mga ARBs.

Pinangunahan kasi ni Pangulong Marcos  ang  distribusyon ng  2,779 land titles sa 2,143  ARBs, mayroong 2,903 ektarya ng agricultural land sa  City of Passi, Iloilo.

“In the same manner, ito nga ‘yung aking sinasabi ang pag-deliver ng mga fertilizer, ng mga makinarya, mga facilities, ay makakatulong upang makamtan natin ang ating hinahanap at ang ating pinapangarap na magandang kinabukasan para sa ating mga magsasaka, para sa ating mga sinasaka at para sa susunod na henerasyon,” ang sinabi ng Pangulo sa kanyang naging talumpati.

“With the distribution of these titles in Western Visayas, in other areas, we are set to exceed our nationwide target for land distribution for the year 2023. So para sa akin, ito na ang pinakamagandang Christmas gift para sa ating lahat,” aniya pa rin.

Ang mga ipinamahaging land titles ay nagmula sa Support to Parcelization for Individual Titling (SPLIT) Project. Kabilang dito ang  2,687 titles  na mayroong  2,784 ektarya, inilaan para sa  2,062 ARBs, at maging ang 92 titles para sa bagong lupain na mayroong 118.7 ektarya, ipinamahagi sa  81 ARBs.

Matatandaang, nitong Hulyo,  nilagdaan ni Pangulong Marcos ang  New Agrarian Emancipation Act, na naglalayong payagan ang amortization ng “principal payments, interest at penalty” ng lupain na tinaniman ng mga magsasaka.

“The new law, or the Republic Act No. 11953, will benefit 610,054 agrarian reform beneficiaries (ARBs) as it writes off P57,557 billion of their loans,” ayon sa ulat.  (Daris Jose)