Life-changing ang maging isang parent: ETHEL, nag-mature na talaga at iniisip ang future ni ELLA

LIFE-CHANGING nga raw ang maging isang parent ayon sa comedienne na si Ethel Booba.

Ina si Ethel sa isang 5-year-old daughter named Ella mula sa kanyang partner na si Jessie Salazar.

“Nag-mature ba ako? Ako rin nga nagugulat e. Nag-mature talaga ako nu’ng naging nanay ako. Oo, iba na ‘yung priorities ko. Ngayon hindi na ako bumibili ng mamahaling damit, kailangan mura na lang kasi mayroon akong pinagkakagastusan kasi ang mahal ng gatas, diaper.

“Ngayon, iniisip ko kailangan ko talagang mag-ipon dahil ‘yung future niya, ‘yung pag-aaral niya doon ako nanganganib kasi Inglesera e. Hirap na hirap talaga ako e. Minsan sasabihin ko ‘ah ok’, minsan magtatanong Ingles, sasabihin ko na lang ‘later i’m busy.’ Kaya ‘yung asawa ko tawang-tawa talaga sa akin kasi hindi ko na talaga siya masagot kasi hirap na hirap ako talaga,” sey ni Ethel.

Bukod nga raw sa pagiging stand-up comedienne, founder din si Ethel ng sarili niyang beauty business sa tulong ng kanyang partner na very supportive at maayos ang communication nila kahit pa busy sila.

“Mas peaceful talaga at kung gusto mo ng pang-matagalan, for lifetime, mas non-showbiz. Communication. Kailangan talaga nag-uusap kayo palagi na alam mo ‘yung huwag mong kimkimin ang sama ng loob mo, kailangan maging open ka sa kaniya. Okay lang na masaktan siya pero kailangan malaman niya kung ano ang mali at malaman ko rin kung ano ang mali ko at doon kami nag-meet.”

Masusundan na kaya si Ella?

“Kung ibibigay. Nag-usap nga kami ni Vice Ganda kasi inanak niya ‘yan e. Sabi ko, ‘parang hindi na.’ Sabi niya, okay din iyan, para mayamang-mayaman siya. Biniro ko na lang na dadagdagan ko, mag-do-donate ka ba pang educational plan’ kasi ‘yun ang pinakamabigat talaga,” tawa ni Ethel.

***

NAKILAHOK ang ilang Sparkle artist at GMA employee volunteers sa isinagawang International Coastal Cleanup Drive sa Pasay City noong nakaraang Sabado, Sept. 21.

Isinagawa ang cleanup drive sa Pasay sa Central Park sa SM by the Bay, na pinangunahan ng Department of Environment and Natural Resources, Philippine Coast Guard, kasama na rin ang GMA Network sa pamamagitan ng Kapuso at Kasambuhay ng Kalikasan.

Nakibahagi ang Sparkle stars na sina Shuvee Etrata, Nikki Co, John Clifford, Seb Pajarillo at Zyren Dela Cruz, at 30 GMA employee-volunteers sa ika-39 Coastal Cleanup na may temang “Clean Seas for Blue Economy.”

Ang paglilinis ay parte ng taunang International Coastal Cleanup Drive na isinasagawa tuwing ikatlong Sabado ng Setyembre, ayon na rin sa Presidential Proclamation 470.

Dala-dala ng volunteers ang kanilang mga sako, face mask, tumbler para sa iinuming tubig at rake para sa paghahakot ng basura.

Daan-daang indibiduwal pa ang nakisali mula sa iba’t ibang tanggapan ng gobyerno, NGOs, mga estudyante at pribadong sektor.

Sa dami ng basura, kinailangang gumamit ng dump truck para mahakot ang mga ito, kung saan ang karamihan ay mga plastic, styrofoam, kawayan at mga driftwood na inanod sa lugar dahil sa mga nagdaang bagyong Carina, Enteng at Habagat.

Ilang ambulansiya pa ang nakaantabay kung sakaling kailangan ng tulong medikal.

Inaasahang aabot sa tone-toneladang basura ang mahahakot sa baybaying dagat ng Manila Bay.

Pinakamalaking nahakot ng SM sa ika-38 International Cleanup noong nakaraang taon ang umabot ng 100,000 kilos ng basura.

(RUEL J. MENDOZA)