2 ‘rapist’ na lolo, nalambat sa Calooocan at Valenzuela

NAGWAKAS na ang pagtatago ng dalawang manyakis na lolo na kapwa wanted sa kaso ng panggagahasa matapos makorner ng pulisya sa magkahiwalay na manhunt operation sa Caloocan at Valenzuela Cities.

Sa kanyang ulat kay Northern Police District (NPD) Acting Director P/Col. Josefino Ligan, sinabi ni Valenzuela police chief P/Col. Nixon Cayaban na nakatanggap sila ng impormasyon na nagtatago sa Lungsod ng Valenzuela ang 82-anyos akusado na si alyas “Jose”.

Ayon kay Col. Cayaban, ang akusado ay nakatala bilang top 1 most wanted person sa San Andres Municipal Police Station (MPS) kaya inatasan niya ang Valenzuela Police Sub-Station (SS8) na bumuo ng team para sa isasagawang pagtugis sa kanya.

Katuwang ang mga tauhan ng San Andres MPS at Catanduanes PPO, agad nagsagawa ang SS8 ng joint manhunt operation na nagresulta sa pagkakaaresto sa akusado dakong alas-5:00 ng hapon sa Block 5, Water Lily Street, Hobart Village, Barangay Ugong.

Ang akusado ay binitbit ng pulisya sa bisa ng warrant of arrest na inisyu ni Presiding Judge Lelu P. Contreras ng Regional Trial Court Branch 43, Virac, Catanduanes na may petsang August 28, 2020, para sa kasong Rape as defined and penalize under Art. 266-A (2) of the RPC.

Samantala, alas-3:45 ng hapon nang masukol naman ng mga tauhan ni Caloocan police P/Col. Paul Jady Doles sa Stone Village, Bagumbong, Barangay 171 ang 63-anyos na si alyas “Kanor” na nakatala bilang top 1 most wanted person sa Naga City.

Binitbit ng pulisya ang akusado sa bisa ng warrant of arrest na inisyu ni Presiding Judge Leo L Intia ng RTC Fifth Judicial Region, Branch 27, Naga City na may petsang June 6, 2019, para sa kasong Rape. (Richard Mesa)