Ban sa nursing programs, maaaring ‘selectively lifted’- CHED

TARGET ng  Commission on Higher Education (CHED) na ikasa ang “strategic and selective lifting” ng  moratorium para sa bagong nursing programs.

Sinabi ni CHED Chairperson Prospero “Popoy” De Vera III na gumagawa na ng bagong poliisya ang  Technical Panel on Nursing ng CHED na ipalalabas sa lalong madaling panahon.

“CHED is working with the DOLE (Department of Labor and Employment) and DOH (Department of Health) to determine the supply and demand for nursing graduates for a possible strategic selective lifting of the moratorium in key geographic areas and types of institutions and the Commission will issue the new policy soon,” ayon kay DE Vera.

Aniya,  may ilang taon na ang nakaraan nang simulan nila ang  assessment, isinaalang-alang  na rin ang  demands na dala ng  coronavirus disease (Covid-19) pandemic.

“The Commission on Higher Education (CHED) has already recognized the need to review the 2011 moratorium on the opening of new nursing programs given the changing regional and global demand for health manpower over the past five years,” anito.

Gayunman, iginiit ni De Vera na ang “whole-of-system lifting” ay maaaring hindi maging pabor, kaya’t may pangangailangan para sa strategic study bago magpatupad ng bagong polisiya.

“The lifting of the moratorium, however, must be based on a correct assessment of the supply and demand for nurses both locally and internationally… The unilateral lifting of the moratorium and allowing all higher education institutions (HEIs) to offer nursing will not address the problem,” anito.

Matatandaang nagpalabas ang CHED ng  Memorandum Order 32 na may petsang  Setyembre  30, 2010, na naglalayong ihinto ang pagbubukas sa lahat ng undergraduate at graduate programs sa business administration, nursing, teacher education, hotel and restaurant management at information technology education simula  school year 2011-2012.

Ang moratorium ay ipinalabas “on the ground that the proliferation of the programs would cause the deterioration of the quality of graduates of these five higher education programs.”

Nauna rito, binatikos ni Cavite Rep Elpidio Barzaga si  sa kawalang aksyon nito sa matagal nang petisyon na humihiling na magbukas ng nursing program sa  Kolehiyo ng Lungsod ng Dasmariñas.

Sinabi ni Barzaga, 11 taon na ang ban ng CHED sa pagbubukas ng bagong nursing program subalit ngayong nasa ilalim ng pandemic ang buong mundo at may mga bagong sakit at virus na nagsusulputan ay malaki ang pangangailangan na palawakin na ang nursing program sa bansa.

Depensa pa rin ni Barzaga,  inaalis ng CHED ang karapatan ng mga estudyante na makapag-aral lalo na sa Kolehiyo ng Lungsod ng Dasmariñas na libre ang pag aaral.

Hiniling nito kay incoming President Bongbong Marcos na magtalaga ng bagong CHED Chairman na malawak ang pang unawa sa sitwasyon.

Iginiit ni Barzaga na kung pagbabatayan ang datos ng World Health Organization (WHO) ay may kakulangan na 4.6 million nurses sa buong mundo pagdating ng  2030 habang sa Pilipinas ay nasa 249,843 shortfall.

Sa datos naman ng Philippine Statistics Authority (PSA) ay nasa 49.4 percent ng mga nagtapos ng high school ang hindi nakakapagkolehiyo dahil sa mahal na tuition fee habang marami ang nais na kumuha ng nursing ang hindi tumutuloy dahil sa P80,000 hanggang  P100,000 kada semester ang matrikula.

Ani Barzaga ang Kolehiyo ng Lungsod Dasmariñas ay handang magbigay ng libreng tuition fee subalit hindi naman makapagbigay ng nursing program dala ng ban ng CHED. (BISHOP JESUS “JEMBA” M. BASCO)