COVID-19 cases tataas pa – DOH

Mismong Department of Health (DOH) na ang nagsabi na inaasahan na rin nilang tataas pa ang mga kaso ng COVID-19 sa bansa dahil sa patuloy na pagpapaluwag ng pamahalaan sa ilang panuntunan matapos ang higit dalawang lockdown.

Ayon kay Health Usec. Maria Rosario Vergeire, hindi naman ibig sabihin nito na dapat mabahala ang publiko.

Dahil kung ang ahensya raw ang tatanungin, sapat at kaya pa ng health system capacity ng bansa ang paghawak sa mga kaso ng sakit.

“Atin pong ine-expect na tataas pa rin ang kaso habang unti-unti nating binubuksan ang ating ekonomiya, bahagyang linuluwagan ang community restrictions at patuloy na tumataas ang ating testing capacity,” ayon sa opisyal.

“Ngunit ang pagtaas ay hindi umaabot sa punto kung saan mao-overwhelm ang ating health system,” dagdag ni Vergeire.

Simula noong June 1, maraming lugar na sa bansa, kasama ang Metro Manila, ang isinailalim sa general community quarantine.

Kasabay nito ang pagbubukas din ng ilang pampublikong establisyemento. Nagbalik trabaho na rin ang maraming empleyado.

Sa kabila nito, tiniyak ng ahensya na may karampatang hakbang din ang national government para tugunan ang posibilidad ng pagtaas ng mga kaso.

Katulad umano ng ginawa sa ilang bahagi ng Visayas na nakitaan kamakailan ng biglaang pagtaas sa mga kaso ng COVID-19. (Daris Jose)