DILG, PNP gigisahin sa ambush at patayan

NAGPAHAYAG ng pag­kabahala si House Speaker Martin Romualdez sa sunud-sunod na patayan sa iba’t ibang panig ng bansa kaya nagpasya itong ipatawag ang Department of Interior and Local Government (DILG) at Philippine National Police (PNP).

Ayon kay Romualdez, isang emergency hearing ang kanilang isasagawa ngayong Lunes bunsod ng sunud-sunod na ambush sa ilang elected officials.

“Nakakabahala na dahil parang halos every week may na-a-ambush,” ayon kay Speaker Romualdez.

Aniya, “gusto na­ting malaman sa PNP at DILG kung kaya ba nila itong pigilan at protektahan ang mamamayan dahil parang hindi na safe lumabas sa kalsada ngayon”?

“The way it looks mukhang pulitika ang motibo sa mga ambush kamakailan dahil mga politicians ang mga biktima,” pansin ng pinuno ng kongreso.

“We will ask the police and the DILG, saan ang problema? Intelligence ba? Or nagiging kampante na tao nila”?, pahabol ni Speaker Romualdez.

Matatandaang kamakailan lang ay malubhang nasugatan ang isang alkalde ng Maguindanao matapos tamba­ngan sa Pasay City.

Pebrero 3 naman nang pagbabarilin sa Pasay City ang sinasakyan kotse ng isang mag-asawang negos­yante at kasama nila.

At nitong Pebrero rin, in-ambush at napatay ang vice mayor ng Aparri, Cagayan.

Mapalad namang nakaligtas si Lanao del Sur Gov. Mamintal Adiong sa ambush ngayong Pebrero rin, pero patay naman ang apat niyang police escort sa Maguindanao. (Daris Jose)