HEALTH WORKER, RIDER, NABANGGA, KRITIKAL

KRITIKAL ang isang health care worker at rider nito matapos mabangga ng isang tractor head sa San Andres Bukid, Maynila.

Sa ulat ng Manila Traffic Enforcement Unit, kinilala ang magka-angkas na biktima na sina Francisco Curay Lacanilao, 50 at Virginia Sanchez Lacanilao, 54, health worker at taga  Sitio Butas Bagumbayan, Caloocan City.

Hawak naman ng pulisya ang driver ng tractor head na si  Danny Pueyo Cabilitasan, 43, ng 115 Northbay Boulevard, Navotas City .

Minamaneho umano nito ang trak na may plakang NUY 936 nang mangyari ang insidente sa kahabaan ng Osmena Hi-way malapit sa kanto ng  Pres. Quirino  Avenue habang sakay naman ng Honda Click ang mga biktima.

Kapwa umano binabagtas ng rider at trak ang Northbound lane ng Osmena  Hi-way nang pagsapit sa  bahagi ng nasabing lugar nang iwasan ng rider ang plastic barrier.

Dito na aksidenteng dumulas ang minamanehong motorsiklo sa kalsada dahilan naman para makaladkad ng kanang bahagi ng gulong ng  container tractor head .

Agad naman dinala sa Philippine General Hospital o PGH ang mga biktima habang  inihahanda ang kasong reckless imprudence resulting  in damage to property with serious  physical injuries. (GENE ADSUARA)