‘Herd immunity’ sa Pasko sa NCR Plus 8, posible

Posible pa rin na maabot ang ‘herd immunity’ sa National Capital Region (NCR) at walo pang lugar sa bansa laban sa COVID-19 sa pagsapit ng Pasko kung matitiyak ng pamahalaan na hindi kakalat sa Pilipinas ang Delta variant na nagmula sa India.

Sinabi ni Fr. Nicanor Austriaco, miyembro ng OCTA, na tiwala siya na makakamit ang herd immunity sa NCR Plus 8 kahit na nasa 2.25 milyon o 3.87% ng populasyon pa lamang ang fully vaccinated nitong Hun­yo 22. Nabatid rin na nasa 8.9 milyong doses na ng bakuna ang naipamahagi ng pamahalaan.

“Given the numbers, our hope that we will reach herd immunity in NCR Plus 8 by Christmas is reasonable. This does not take into effect the Delta variant,” saad ni Austriaco.

Sa kasalukuyan, may 17 kaso ng Delta variant pa lamang ang naiuulat sa bansa na ikinasawi ng isang pasyente.

Una na ring inihayag ng Department of Health (DOH) na target nilang mabakunahan ang 108,000 indibidwal kada araw sa Metro Manila, Batangas, Bulacan, Cavite, Laguna, Pampanga, Rizal, Metro Cebu at Metro Davao na maaaring maisagawa dahil sa pagdatingan ng mas maraming bakuna ngayon.

Ngunit hindi rin dapat pakasigurado ang pamahalaan sa posibleng surges ng Delta variant na dahilan ng surges sa India at ngayon ay sa ilang bansa sa Africa.

“Over the past year and a half, we have a surge when there’s a new variant. It’s now coming down after the arrival of Alpha and Gamma variants. Now we have to protect ourselves against Delta,” paalala ni Austriaco. (Gene Adsuara)