Hidilyn Diaz unti-unting nagpapakondisyon

Mas pinili ni Tokyo Olympic Games gold medalist Hidilyn Diaz na ibalik ang kanyang focus para humugot ng bagong lakas sa paglahok sa mga susunod na international competitions.

Unti-unti nang nagpapakondisyon ang national lady weightlifter sa isang training camp sa Malacca, Malaysia kasama ang kanyang fiance at coach na si Julius Naranjo.

“After winning an Olympics, Hidilyn and TeamHD had made a decision to take a step back after 5 grueling years of sacrifices and challenges that came along with sports and the pandemic,” wika kahapon ni Naranjo sa kanyang Facebook post.

Bumalik sina Diaz at Naranjo sa Malaysia kung saan nagsanay ang 2019 Southeast Asian Games gold medalist para sa nakaraang Tokyo Olympics upang paghandaan ang darating na 2021 World Weightlifting Cham-pionships sa Tashkent, Uzbekistan.

Ngunit hindi na itinuloy ni Diaz ang kanyang pagsali sa nasabing world championships dahil sa kawalan ng focus at sapat na ensayo.

“With the world championship neither being an important competition, nor Olympic Qualifier, these next few months will be a step forward in terms of building the champion mindset, and the physical form towards the end goal of Paris 2024,” ani Naranjo sa tubong Zamboanga City.

Sa 2022 ay lalahok si Diaz sa 31st Southeast Asian Games sa Hanoi, Vietnam sa Mayo at sa 19th Asian Games sa Hangzhou, China sa Setyembre.