‘House visit’ sa media ipinatigil, iimbestigahan ng PNP

PINAIIMBESTIGAHAN  ni Philippine National Police chief PGen. Rodolfo Azu­rin, Jr. ang isinagawang ‘house visit’ ng ilang mga pulis na nagbigay ng pa­ngamba sa ilang miyembro ng media.

Ayon kay PNP spokesperson Police Colonel Jean Fajardo, bukod sa imbestigasyon papanagutin din ang mga pulis na responsable sa pagpapatupad nito.

Sinabi ni Fajardo na maglalabas sila ng pa­nuntunan o sistema kaugnay ng house visit lalo pa’t walang direktang utos mula sa  PNP headquarters at National Capital Region Police Office (NCRPO) kung paano makakausap ang bawat mamamahayag na may banta sa kanilang buhay.

“There was no direct instruction or directive coming from the national headquarters na magkaroon ng house visitation sa bahay ng ating kasamahan sa media,” ani Fajardo.

Sa ngayon aniya, maliwanag na koordinasyon lamang ang sinasagawa ng bawat police district sa mga mamamahayag at pagtatanong kung may nakakatanggap sila ng pagbabanta.

Isa sa kanilang liliwanagin ay pagkakaroon ng access ng mga pulis sa address ng bahay ng media. Aniya, dapat liwanagin kung paano nakuha at ang  source ng impormasyon.

“We are not making excuses. May mali talaga sa naging procedure. Kung maganda ang intensyon, maganda ‘yung efforts nila, subalit dapat talaga nagkaron muna ng coordination or probably isinama ‘yung barangay,” dagdag pa ni Fajardo.

Samantala, ipinatigil na ni NCRPO chief Police Brigadier General Jonnel Estomo ang ‘house visit’ o pagbabahay-bahay ng mga pulis upang bisitahin ang mga mamamahayag kaugnay ng mga posibleng pagbabanta sa buhay dahil sa kanilang mga trabaho.

Ayon kay Estomo, nagpasya silang itigil na ang house visit makaraan magpahayag ng pagkabahala ang ilang mamamahayag sa sistema

Paliwanag naman ni PLtCol. Dexter Versola, tagapagsalita ng NCRPO, layon ng house visit na  makakuha ng impormasyon sa posibleng banta sa ilang miyembro ng media.

Bagama’t malinis ang kanilang hangarin, sinabi ni Versola na posibleng nagbigay ito ng maling mensahe sa mediamen. (Daris Jose)