Ilang lugar sa Metro Manila at Cavite, 1-linggong mawawalan ng tubig

MAY ISANG linggong mawawalan ng suplay ng tubig ang mga kustomer ng water concessionaire na Maynilad Water Services Inc. sa ilang bahagi ng Metro Manila at lalawigan ng Cavite.

Sa isang abiso, sinabi ng Maynilad na kabilang sa mga lugar na makakaranas ng water service interruption ay ang ilang lugar sa Las Piñas City, Muntinlupa City, Parañaque City, at Pasay City, sa Metro Manila at Bacoor City, at Imus City sa Cavite.

Ang naturang water service interruption ay nagsimula nitong Linggo at magtatagal hanggang Abril 23.

Gayunman, inaasahang magiging normal na ang serbisyo ng tubig sa ilan sa mga naturang lugar pagsapit ng Abril 22.

Sinabi ng Maynilad na ang water service interruption ay bunsod ng isinasagawang pinaigting na paglilinis ng mga filters sa Putatan Water Treatment Plants.

“The turbidity level of the raw water in Laguna Lake has been gradually decreasing since the Amihan season ended, but the process is taking longer than anticipated. Due to this, we have to extend our maintenance activities at the plants,” anang Maynilad.

“Normal operations will be restored once the cleaning of the filters is completed,” dagdag pa nito.

Pinayuhan naman ng Maynilad ang mga kustomer nito na maaapektuhan ng water service interruption na mag-imbak ng sapat na suplay na tubig.

Sakali naman umanong bumalik na ang suplay ng tubig, dapat munang hayaang tumulo ang maitim na tubig hanggang sa tuluyan na itong luminaw.

Maaari namang ipunin ang maitim na tubig at gamitin sa ibang bagay, gaya ng pandilig ng halaman, panlinis o di kaya ay pag-flush ng inidoro.