Imbestigasyon ng Tri Comm ukol sa pagkalat ng pekeng balita at malisyosong content sa social media platform, nilinaw ng mambabatas

NILINAW ni Surigao del Norte Rep. Robert Ace Barbers na ang ginagawang imbestigasyon ng Tri Comm ukol sa pagkalat ng pekeng balita at malisyosong content sa social media platform ay hindi para gipitin ang freedom speech o expression.

“I just would like to reiterate that the objective of the hearings the Tricom is conducting is not to suppress the freedom of expression or the freedom of speech,” pahayag ni Barbers sa ginanap na pagdinig ng three-committee panel, na pansamantalang panmamumunuan ni Antipolo City Rep. Romeo Acop.

Batid aniya nila na nakasaad sa konstitusyon ang kalayaan na ito at nirerespeto nila ang karapatan ng bawat isa ukol sa kanilang opinyon o pahayag.

Subalit, taliwas aniya sa inaakala ng iba ay hindi ginagawa ang pagdinig para gipitin ang ang karapatan na ito.

“Contrary to what others may be thinking, this is not in any way a tool to suppress their expressions or opinions on certain issues, whether they may be political or economic or even other points of views,” ani Barbers.

Wala rin aniya sa kanya kung tinitira siya ng mga vloggers ngunit dapat maging maingat ang mga ito sa ipinopost on line, dahil kung napatunayan itong peke o kasinungalingan ay may mga batas na magpaparusa sa mga ito.

“Kaya po tayo may mga batas, and let me remind them too that this right, though it is provided for in our Constitution, is not an absolute right. So para lang po malinaw, to put the discussion in the context of what we want to achieve in this hearing,” pahayag nito. (Vina de Guzman)